Некои овошја и зеленчуци содржат салицилати, хемиски соединенија кои можат да дејствуваат како природни разредувачи на крвта. Тие спречуваат лепење на тромбоцитите и формирање на згрутчувања, со што придонесуваат за подобра циркулација. Иако не се замена за лекови, вклучувањето на одредени намирници во исхраната може да го поддржи здравјето на циркулаторниот систем. Значи, според истражувањата, ова се намирници кои дејствуваат како природни разредувачи на крвта и природно ја подобруваат циркулацијата.
1. Бобинки
Капините, боровинките, брусницата и јагодите се богати со салицилати, но и со антиоксиданси кои имаат антиинфламаторни својства. Спречувањето на воспалението во крвните садови може да го подобри протокот на крв и да го намали ризикот од згрутчување на крвта. Студија од 2016 година покажа дека редовната консумација на бобинки може да ја намали акумулацијата на тромбоцити и да го намали крвниот притисок, пишува Health.
2. Портокали
Портокалите и грејпфрутот, покрај салицилатите, содржат и флавоноиди, моќни антиоксиданси. Флавоноидите можат да го подобрат протокот на крв со намалување на крвниот притисок и артериската вкочанетост. Со проширување на крвните садови, тие овозможуваат послободен проток на крв и го намалуваат ризикот од блокада.
3. Грозје
Грозјето и екстрактот од неговите семки се богати со флавоноиди и полифеноли, антиоксиданси кои спречуваат згрутчување на крвта. Студија од 2019 година покажа дека екстрактот од семки од грозје може да го забави згрутчувањето, но потребни се повеќе студии за да се утврди дали свежото грозје има ист ефект. Важно е да се напомене дека екстрактот од семки од грозје како додаток во исхраната може да реагира со разредувачи на крвта и да го зголеми ризикот од крварење, па затоа е потребна претпазливост и консултација со лекар.
4. Калинка
Калинките се богати со полифеноли и нитрати, природни хемикалии што телото ги претвора во азотен оксид. Азотниот оксид ги шири крвните садови, што го подобрува протокот на крв и помага во намалувањето на крвниот притисок.
5. Лиснат зелен зеленчук
Кељот и спанаќот се исто така богати со нитрати, за кои е докажано дека го подобруваат протокот на крв, здравјето на срцето и ја намалуваат агрегацијата на тромбоцитите. Истражувањата покажуваат дека луѓето чија исхрана е богата со зеленчук со висока содржина на нитрати имаат понизок крвен притисок. Нитратите од зеленчукот имаат позитивен ефект, за разлика од оние во преработеното месо кои се поврзани со ризик од рак. Сепак, лиснатиот зеленчук содржи и витамин К, кој може да влијае на лекот за разредување на крвта Кумадин (варфарин), па затоа на пациентите кои го земаат им се препорачува да разговараат со својот лекар.
6. Лук
Лукот е познат по своите антиоксиданси кои ја подобруваат циркулацијата и здравјето на срцето. Содржи соединение алицин, кое има антитромбоцитно дејство, но потребни се дополнителни истражувања за да се потврди дали лукот спречува згрутчување на крвта.
7. Кромид
Како и лукот, кромидот е богат со антиоксиданси и има антиинфламаторни својства. Со намалување на воспалението во крвните садови, кромидот помага во олеснување на протокот на крв и го подобрува здравјето на срцето.
Дали има причина за загриженост?
Потребни се повеќе истражувања за да се утврди дали природните разредувачи на крвта имаат значаен ефект врз згрутчувањето. Научниците истакнуваат дека нивниот ефект не е ни приближно толку силен како оној на лекови како аспирин. Иако повеќето здрави луѓе можат безбедно да ги консумираат овие овошја и зеленчуци, луѓето кои земаат лекови треба да бидат внимателни. Комбинирањето на природни разредувачи на крвта со лекови може да го зголеми ризикот од крварење. Обавезно консултирајте се со вашиот лекар ако земате антитромбоцитни лекови, антикоагуланси, нестероидни антиинфламаторни лекови (НСАИЛ) или антиаритмични лекови.
