Општина Кичево ги предупредува граѓаните да внимаваат при купувањето станови, бидејќи на територијата на Општината била евидентирана зачестена злоупотреба на издадените одобренија за градење.
– Во Одделението за инспекциски работи – Инспекторат на Општина Кичево се водат постапки за објекти кај кои не е почитувано одобрението за градење, поради што е доведен во прашање статусот на тие објекти, а имотните листови на инвеститорите може да претрпат одредени измени – нагласуваат од Општината.
Оттаму ги повикуваат граѓаните пред потпишувањето какви било купопродажни договори да се обратат во просториите на Општина Кичево и да побараат подетални информации за конкретните објекти за да бидат заштитени од евентуални манипулации и злоупотреби.
