Се пошумуваат ридовите над Струмица, во градот се гради нов парк

Во организација на Доброволното Противпожарно Друштво “Струмица”, во соработка со општина Струмица, Црвен Крст од Струмица заедно со дечињата од средните училишта од општина Струмица, во тек е организирана акција за пошумување на ридовите над Струмица, поточно кај месноста Чам Чифлик.

– Ова се белите дробови на градот. Пред одредени години овде имаше голем пожар и за жал имаше жртви. Да засадиме дрвја и да ја вратиме шумата со што ќе придонесеме кон почиста и позелена иднина – истакна заменик директорот на ЈП „Национални шуми“, Кире Михаилов.

И не се засадуваат само ридовите над Струмица, туку деновиве почна изградбата на нов парк во градот кој е со големина од 27.515 квадратни метри.

– Наша обврска е да го уредиме просторот околу паркот со соодветна патна инфраструктура, асфалтен пат, тротоарски пешачки зони за да можата нашите сограѓани да имаат подобар пристап до овој дел на градот и нормално јавното претпријатие „Комуналец“ да го уреди просторот околу паркот. Овде не застануваме. Во периодот којшто следува ќе имаме и други активности за уредување на јавни површини, озеленување и нивно одржување како во градот така и во населените места – изјави градоначалникот на Струмица, Петар Јанков.