Можете ли да замислите најдобриот возач во Формула 1 или рели да се плаши од брзина? Секако, тешко е да се замисли, исто како што некои би рекле дека е тешко да се замисли некој што се плаши од висина, а се натпреварува во скијачки скокови.
Токму таква фобија има Филип Рајмунд, кој се занимава со ски-скокови, а од понеделникот е носител на златен олимписки медал откако победи на малата скокалница!
Германецот отворено зборуваше за својот страв од висина, не криејќи дека понекогаш му паѓа на ум токму таму каде што треба да биде најмирен, на врвот на скокалницата за полетување. Пред одредени натпревари, тој се чувствувал блокиран и физички несигурен, што во спорт каде што нијанси одлучуваат дали сте најдобар или сте предодредени на катастрофа, не треба да се случува.
Поради ова, тој донесувал и тешки одлуки што биле неразбирливи за јавноста. Тој пропуштал настапи на големи скокалници, вклучувајќи ја и Планица, признавајќи дека во одредени моменти неговото тело, едноставно, не реагирало онака како што треба да реагира еден спортист на тоа ниво.
- Многумина од вас веќе ме прашаа зошто не скокам, па еве го објаснувањето. Како што некои од вас веќе знаат, имам страв од висина, напиша Рајмунд на „Инстаграм“, откако се повлече од натпреварувањето во Словенија минатиот март.
Наместо да бега од проблемот, Филип Рајмунд решил да го анализира тоа докрај. Работел со психолози, ја приспособил својата подготовка и научил како да го контролира стравот, а не да го елиминира. Целта не била да стане бестрашен, туку функционален, способен да скока дури и кога ќе се вклучи внатрешниот аларм.
Затоа, неговото олимписко злато не е само спортски резултат туку и редок пример за победа над себеси. Во спорт кој буквално започнува на висина, Рајмунд докажа дека храброста не значи отсуство на страв, туку способност да скокнете во празнината со него и да слетате на нозе.
