Се пензионираше еден од најтрофејните македонски тренери

Еден од најтрофејните македонски тренери, Перо Стамески, замина во пензија. Тој зад себе има импресивна тридецениска тренерска кариера во која освои многу трофеи, како девет шампионски титули, шест куп-трофеи и бројни успеси во младинските категории.

Последниот ангажман го имаше во женскиот кошаркарски клуб Бадел 1862, со кој освои бројни трофеи и признанија, а по тој повод се огласија и од тимот.

• По 36 години несебична посветеност, пожртвуваност и искрена љубов кон кошарката, со голема почит и емоции соопштуваме дека тренерот Перо Стамески – човекот кој не само што ја испиша историјата на нашиот клуб туку и ја обликуваше иднината на многу генерации кошаркарки, заминува во пензија. Во текот на својата славна кариера, Перо Стамески освои вкупно 9 шампионски титули со сениорскиот тим, 6 титули во националниот куп, како и бројни трофеи во младинските категории, покажувајќи дека вистинскиот успех не се мери само со резултати, туку и со трајното влијание што го оставаш зад себе. Од името на целиот клуб, сегашните и поранешните кошаркарки, тренерскиот тим и управата – благодариме за секоја минута помината на паркетот, за секоја победа, секој совет, секоја подадена рака и секоја тешка одлука што нè водеше кон успех. Ова не е збогум, туку до видување. Ќе останете дел од оваа кошаркарска фамилија засекогаш, со местото што ви припаѓа – во срцето на ЖКК Бадел 1862 и историјата на македонската кошарка. Благодариме Тренеру!, напишаа од клубот на социјалните мрежи.

На негово место доаѓа неговиот асистент Дарко Димитријевиќ, тренер со преку три децении професионално искуство во спортот.

• Ни претставува огромна чест и задоволство да го претставиме новиот главен тренер на сениорскиот тим на ЖКК Бадел. Познат по својата методичност, аналитичност и способност да препознае веруваме дека своето огромно познавање на кошарката успешно ќе го префрли на нашите баделки и ќе го извлече нивниот максимум во новата 2025/26 сезона. Му посакуваме успешна сезона и соработка на тренерот Дарко, соопштија од ЖКК Бадел.