Никој не може да негира дека некогаш беше најдобрата „десетка“ на светот. Тоа беше пред околу 15 години кога тој палеше и гасеше на зелениот терен. За жал денес изгледа непрепознатливо. Пороците и непрофесионалниот начин на живот го зедоа својот данок, но, барем се смири и не ги полни колумните на таблоидниот печат.
Весли Снајдер беше познат како најголемиот светски талент, играше за Ајакс, а потоа се пресели во Реал (М), врвот на кариерата го доживеа во Интер, потоа играше за Галатасарај, Ница и други клубови…
Најголемиот успех во кариерата го постигна во 2010 година кога ја освои тројната круна со Интер, а Холандија ја одведе до финалето на Светското првенство, на крајот остана без Златната топка – неоправдано.
Тој во неколку наврати призна дека водел несериозен живот за професионалец, особено кога играше за Реал (М) и Интер.
-Бев млад и го ценев успехот и вниманието. Бев навикнат да живеам како ѕвезда. Те обожаваа како играч на Реал (М). Одев по улица, трошев илјадници евра и им купував работи на луѓето. Не можам да кажам дека нешто не си дозволив,изјави Снајдер, за кој беше познат по тоа што западна во финансиски проблеми.
Во сезоната кога Интер ја освои Лигата на шампионите, Снајдер се забавуваше до шест часот наутро, навечер излегуваше на терен и доминираше.
„Еднаш јас и мојата сопруга отидовме на забава организирана од Армани. Таму беа Џорџ Клуни и Меган Фокс. Се вративме дома во шест часот наутро, а навечер запишав асистенција и постигнав гол во Лигата на шампионите против Вердер. Откако еднаш го направив тоа, не се плашев да го направам тоа повторно“, изјави легендарниот Холанѓанец.
И самиот призна дека чашата чинела повеќе од многу подобра и поуспешна кариера. Можеше да биде подобар од Роналдо и Меси, двајца играчи кои одбележаа ера, но …
„Можев да бидам како Меси и Роналдо, но едноставно не го чувствував тоа. Уживав во животот, можеби имав дополнителна чаша вино за време на вечерата. Лео и Кристијано се различни, направија многу жртви и јас сум добро со тоа. Сепак, мојата кариера секако беше неверојатна“.
Снајдер долги години беше во брак со Јоланте Кабау, со која се разведе пред пет години. Сето тоа оставило сериозен белег на него бидејќи нагло се здебелил. Овој 40-годишник денес најмногу се занимава со приватен бизнис, а најчесто е гостин коментатор на одредени телевизиски станици во Холандија.
