Се огласи Путин за разговорот со САД за завршување на војната во Украина: „Тешка работа“

Рускиот претседател Владимир Путин изјави дека неговите петчасовни разговори со американските претставници за завршување на војната во Украина биле „неопходни“ и „корисни“, но исто така и „тешка работа“, при што некои од предлозите биле неприфатливи за Кремљ.

Ова го истакна Путин за ТВ каналот „Индија тудеј“ пред неговата посета на Њу Делхи денес, и иако целото интервју сè уште не е емитувано, руските државни новински агенции „Тас“ и „РИА Новости“ пренесоа некои од изјавите на Путин, објави АП.

Коментарите на рускиот лидер доаѓаат во време кога специјалниот претставник на американскиот претседател Доналд Трамп, Стив Виткоф, и неговиот зет, Џаред Кушнер, ќе се сретнат со главниот преговарач на Украина, Рустам Умеров, денес во Мајами за понатамошни разговори, според висок функционер на администрацијата на Трамп, кој не бил овластен јавно да коментира и зборувал под услов на анонимност.

Разговорите со висок ризик се дел од обновениот напор на Трамп да ја заврши речиси четиригодишната војна. Мировните напори неодамна добија на интензитет, иако помирувањето на „црвените линии“ на Русија и Украина останува тешка битка.

Трамп вчера изјави дека Виткоф и Кушнер ја напуштиле маратонската средба со Путин во Кремљ убедени дека тој сака да ја заврши војната.

„Нивниот впечаток беше многу силен дека тој сака да склучи договор“, рече Трамп.

ТАСС го цитираше Путин во едно интервју дека разговорите во Кремљ „морале да поминат низ секоја точка“ од мировниот предлог на САД, „поради што траело толку долго“.

„Ова беше неопходен разговор, многу конкретен“, рече рускиот претседател.

Имаше одредби за кои Москва рече дека е подготвена да разговара, додека за други „не можеме да се согласиме“, рече Путин.

„Тоа е тешка работа“, додаде тој.