Се огласи кралот Чарлс за апсењето на неговиот помлад брат Ендру!

Британскиот крал Чарлс III се огласи по апсењето на неговиот помлад брат, поранешниот принц Ендру, велејќи дека „законот мора да си го направи своето“, откако ја изрази својата „длабока загриженост“ за неговото притворање.

– Со длабока загриженост ја примив веста за Ендру Маунтбатен-Виндзор и сомневањето за злоупотреба на јавна функција. Она што сега следи е целосен, фер и правилен процес со кој ова прашање ќе биде соодветно истражено од страна на надлежните органи. Во ова, како што веќе реков, тие ја имаат нашата целосна и искрена поддршка и соработка – изјави британскиот монарх во изјавата.

– Да бидам јасен: законот мора да си го направи своето. Додека овој процес продолжува, не би било соодветно да коментирам понатаму за ова прашање. Во меѓувреме, моето семејство и јас ќе продолжиме со нашата должност и служба на сите вас – се додава во соопштението.

Поранешниот принц Ендру Маунтбатен-Виндзор беше уапсен во четврток наутро на неговиот имот во Сандрингам.

Според полицијата, тој бил приведен на неговиот 66-ти роденден, а причината е сомневање за злоупотреба на јавна функција.

Иако не се објавени дополнителни детали, се верува дека случајот е тесно поврзан со објавувањето на три милиони документи поврзани со покојниот педофил Џефри Епштајн, кој беше близок пријател на Ендру.

Се смета дека ниту кралот Чарлс ниту Бакингемската палата не добиле претходно известување за апсењето.