Се огласи братот и вујко на жртвите во скопски Карпош: „Ова е убиство, институциите потфрлија по години пријавувано насилство“

По повод денешната трагедија што се случи во скопската населба Карпош во станбениот комплекс „Алумина“, каде жена и дете го загубија животот по пад од балкон, се огласи братот и вујко на жртвите, Александар Стојаноски, преку статус на Фејсбук.

„Денес потфрли МВР, Социјалните служби, денес потфрли целиот наш систем … После години на пријавувано семејно насилство, физичко и психичко насилство врз двете, закани, пријавувања, обид за убиство во сред државна институција, ги загубив внуката и сестрата.

Државата овозможи да згаснат млади животи, ве молам да не шпекулирате што се случило, никој нема да ми ги врати најмилите, но правдата ќе мора да се истера до крај и нема да запреме додека не се случи тоа!

Со оглед на тоа што и покрај сите пријави и случувања, институциите не постапија до сега, барам фокус од јавноста и медиумите за ова, нема да дозволиме да помине само како бројка, правдата мора да го стигне секој еден!

Сестра ми денес требала повторно да иде во социјално, за сите овие работи, а со внуката се слушнавме за Прочка, ми рече – вујче прости ми ако сум ти згрешила нешто … вујчино, прости ми ти, прости на овие неспособни институции, а јас вујче, нема никогаш да простам и да заборавам

Споделете, да не се заборави и изгуби низ нашиот систем!“ , стои во објавата на Стојаноски на Фејсбук.

Мајка и нејзиното дете загинаа по пад од шести кат во комплексот „Алумина“ во Карпош