Се нормализира воздушниот сообраќај во Грција, сѐ уште се истражува причината за прекинот на радиокомуникациите со авионите

Воздушниот сообраќај во Грција се враќа во нормала со повторното отворање на нејзиниот воздушен простор, објави вечерва Управата за цивилно воздухопловство.

Таа соопшти дека е решен „техничкиот проблем“ што се случил денес во 08:59 часот истовремено на сите радиофреквенции за комуникација на контролата на воздушниот сообраќај со авионите.

Пречките биле во форма на „шум“ што, според првичните индикации, потекнувал од телекомуникациската инфраструктура и им оневозможил на контролорите на воздушниот сообраќај да комуницираат со авионите.

Работата на радиофреквенциите на контролата на воздушниот сообраќај и оперативните комуникациски телефонски системи била целосно обновена од 17:00 часот по локално време.

Најавата за затворање на грчкиот воздушен простор била повлечена, а од 17:45 часот, капацитетот на сообраќајот во воздушниот простор и протокот на воздушниот сообраќај се вратиле на нормални нивоа.

Во сите фази од управувањето со инцидентите, безбедноста на летот била целосно обезбедена, во согласност со меѓународните стандарди, се вели во соопштението.

Администрацијата изјави дека „причината за техничкиот проблем, кој никогаш порано не е евидентиран во овој обем и форма, темелно ја истражуваат електронските инженери на Грчката управа за цивилно воздухопловство“ и дека „во тек е лет на специјално опремен авион за проверка на радиоспектарот“.

Илјадници патници беа блокирани на аеродромите во Грција и на други места во Европа откако проблем со радиото ја принуди Грција да го затвори својот воздушен простор, предизвикувајќи бројни откажувања и доцнења.

Дојдовните летови беа пренасочени главно кон Турција, додека на некои им беше наредено да се вратат на местото на поаѓање.

Со летовите низ Грција прекинати поради технички проблем со радиостаниците на авионите, аеродромот во Солун беше целосно затворен денес откако беа прекинати комуникациите во воздушниот сообраќај.

Главниот аеродром во Грција, во Атина, беше меѓу најтешко погодените. До попладне беа откажани повеќе од 90 летови до и од аеродромот.