Се крчка нов закон за рударство – преку 100 предлози од граѓаните

Во Министерството за енергетика, рударство и минерални суровини (МЕРМС) се крчка нов закон за рударство и оттаму велат дека уште во рана фаза од подготовката беше јавно објавен на платформата ЕНЕР со цел да биде достапен за увид и анализа од сите засегнати страни, а јавната расправа резултираше со исклучително голем одѕив.

– Јавноста имаше можност во период од 30 дена да го разгледа првичниот текст на законот за рударство, кој беше јавно објавен на платформата ЕНЕР. Јавниот увид траеше до 28 август 2025 година, а во овој период пристигнаа бројни мислења, предлози и забелешки од компании, институции, стручната и граѓанската јавност. „Јавната расправа ни овозможи вредни препораки и забелешки за Нацрт-законот – вели министерката Сања Божиновска.

Паралелно се оди и со следната фаза од усогласување на законскиот предлог, при што се разгледуваат сите доставени предлози и забелешки.

– Ќе организираме работни средби со оние што се изјасниле за предлог-текстот. Нашата цел е да добиеме усогласено, јасно и спроведливо законско решение кое ќе обезбеди заштита на животната средина, висока безбедност при работа и предвидлива инвестициска рамка – вели Божиновска.

Во наредниот период, МЕРМС ќе ги разгледа детално сите пристигнати предлози и ќе ги прифати оние што се во насока на подобрување на законското решение, во интерес на државата и граѓаните.

– Финалниот закон ќе овозможи одржлива експлоатација и преработка на минерални суровини според највисоки стандарди, засилена контрола и транспарентност во сите процеси, задолжителни мерки за рекултивација и заштита на локалните заедници, јасна и правично поставена регулатива за сите учесници во секторот – нагласуваат од МЕРМС.

Министерството нагласува дека инсистира на строга примена на правилата и нулта толеранција за прекршувања, во интерес на безбедноста, заштитата на животната средина и добросостојбата на локалните заедници.