Здравствената состојба на потпретседателот на Владата на Србија и претседател на СПС, Ивица Дачиќ, засега не е променета и е стабилна.
„Интензивните мерки за лекување продолжуваат. Засега е стабилен, ноќта ја помина мирно“, изјави утрово помошникот-директор на Клиниката за пулмологија, Спасоје Попевиќ.
Според информациите од болницата, Дачиќ бил хоспитализиран поради тешка пневмонија и моментално е на респираторна поддршка, под постојан медицински надзор.
Лекарите истакнуваат дека министерот има и дијабетес, како и други коморбидитети, што дополнително ја комплицира клиничката слика.
Ивица Дачиќ во неколку наврати јавно зборуваше за сериозните здравствени проблеми со кои се бори со години. Во март минатата година, самиот Дачиќ јавно го призна притисокот под кој работел, отворено зборувајќи за тоа колку бил презаситен и како поради тоа нивото на шеќер во крвта му се зголемило катастрофално.
„Знаете, вчера ми беше шеќер во крвта 20. Сето тоа може да трае, но само за кратко време. Денес е околу 15, и покрај сите лекови што ги земам… И што можам да направам, не можам да кукам“, рече Дачиќ тогаш.
Покрај дијабетесот, Дачиќ открил пред три години дека има проблеми со срцето. Како што истакна Дачиќ тогаш, поради екстремно низок срцев ритам, итно бил примен на преглед на срцето и му била направена коронарна ангиографија.
„Имам теорија дека сум добро додека не одам на лекар. Патем, не сакам да одам на лекар. Знаете, со години имам висок шеќер во крвта, а неодамна имав многу низок срцев ритам, па потоа лекарите ме замолија да проверам зошто, па отидов на коронарна ангиографија. За среќа, срцето ми е добро“, рече Дачиќ во гостување на Пинк ТВ.
