Се доградува училиштето „Кирил Пејчиновиќ“ за да има едносменска настава 

Основното училиште „Кирил Пејчиновиќ“ во општина Кисела Вода се доградува за да се обезбедат услови за спроведување на едносменска настава во ова училиште.

– Доградбата предвидува шест нови училници, по две на приземје, на првиот и на вториот кат, со вкупна површина од 390 квадратни метри. Градежните работи се во напредна фаза, а ова е уште една потврда за нашите заложби за системско унапредување на условите за сите ученици. Дополнително, на овој начин, се овозможуваат и долгорочни заштеди во сметките за електрична енергија и другите ресурси, со што значително ќе се намалат трошоците на училиштето – вели градоначалникот Орце Ѓорѓиевски.

Тој смета дека ваквиот пристап треба да стане насока во планирањето и стандард за сите училишта на територија на Скопје.

Вредноста на проектот изнесува 18.731.093 денари, средства што општината ги обезбеди  преку првиот повик од Владата за капитални инвестиции наменети за општините.

– Аплициравме и за доградба на ООУ “Невена Георгиева Дуња”, со што целосно ќе се овозможи едносменска настава во сите основни училишта во општина Кисела Вода – изјави Ѓорѓиевски.