„Само еден тенисер може да ги запре Алкарас и Синер, а не е Ѓоковиќ“

Сезоната на земја почна со мастерсот во Монте Карло, без Новак Ѓоковиќ. Најдобриот тенисер на сите времиња одлучи да се повлече од турнирот и некои експерти веќе го отпишуваат. Меѓу првите што го направија тоа беше Рикардо Пјати, кој ги тренираше и Србинот и Јаник Синер. За него, само еден играч може да ги запре Карлос Алкарас и Синер на земја.

– Единствениот што може да ги загрижи на земја е Саша Зверев. Тој е одличен работник. Неговиот татко е тренер, и тоа му одговара. Морам да признаам, би било добро да донесе некој, да му помогне малку со сервисот, нема да му штети. На земја, очекувам добри работи од Лоренцо Мусети, кој секогаш игра добро на Ролан Гарос – објасни Пјати.

Рикардо верува дека Енди Мареј треба да му биде тренер на Јаник кога ќе се пензионира Дарен Кејхил и му даде мала предност на Шпанецот на земјена подлога.

– Алкарас и Синер се над сите други, им треба малку време да се приспособат на земјената подлога. Карлос дојде порано и започна со полна брзина, па Јаник ќе мора малку да го брка сега. И двајцата имаат иста цел: да го освојат Ролан Гарос. Ќе видиме како ќе се врати Алкарас на вистинскиот пат по неколкуте порази и колку време ќе му биде потребно. Ќе видиме и како ќе се подготви Синер за земјената подлога – заклучи Пјати.

Кој е Рикардо Пјати?

Рикардо Пјати (67) е легендарен италијански тренер. Има работено со најдобрите и неговото мислење е особено ценето во светот на тенисот. Меѓу многуте други, ги тренирал Ѓоковиќ, Синер, Иван Љубичиќ, Ришар Гаске, Милош Раониќ… Веќе на 20-годишна возраст сфатил дека сака да биде тренер и учел од друг легендарен тренер – Нико Болитиери.

Пјати ја започна својата професионална тренерска кариера кога го тренираше Ренцо Фурлано, потоа Кристијан Карати, а потоа Омар Капрезе. Тој почна да работи со Љубичиќ во 1997 година. Тој работеше со Хрватот до крајот на неговата кариера, во 2012 година, помагајќи му да стигне до третото место на АТП-листата. Во тој период, тој работеше и со голобрадиот Новак, а долгорочна соработка не се случи бидејќи Рикардо одби целосно да му се посвети нему, а и на заедничката работа. Тој, исто така, тврди дека во 2006 година знаел дека Новак може да стане еден од најдобрите и да ги победи Роже Федерер и Рафа Надал.

Пјати работеше и со многу други играчи, почна да работи со Борн Ќориќ (од 2017 до 2019 година), но потоа раскинаа бидејќи почна да работи со Марија Шарапова. Потоа почна да работи со Синер. Работеше со него од 2019 до 2022 година и преку него се случија тренинзите и првата средба меѓу Ѓоковиќ и Синер.