САД нудеа 10 милиони долари за неговата глава – сега Ал Шара е почесен гостин на Трамп

Американскиот претседател Доналд Трамп денеска е домаќин на својот сириски колега Ахмед ал-Шара во Белата, поздравувајќи ја некогаш отфрлената земја во глобалната коалиција предводена од САД што се бори против терористичката група Исламска држава.

Ова е прва посета на Белата куќа од страна на сириски шеф на држава откако оваа блискоисточна земја доби независност од Франција во 1946 година, а доаѓа откако САД ги укинаа санкциите наметнати врз Сирија за време на деценијата владеење на семејството Асад. Ал-Шара ги предводеше силите што го соборија поранешниот сириски лидер Башар ал-Асад минатиот декември и беше именуван за лидер на земјата.

Трамп и ал-Шара првпат се сретнаа во Саудиска Арабија во мај. Во тоа време, американскиот претседател го опиша ал-Шара како „млад, привлечен човек. Цврст човек. Силно минато, многу силно минато. Борец“.

Ова беше првата официјална средба меѓу САД и Сирија од 2000 година, кога поранешниот претседател Бил Клинтон се сретна со Хафез Асад, таткото на Башар.

По состанокот, Трамп нареди укинување на повеќето санкции врз Сирија, што е значајна промена во надворешната политика на САД. Но, Цезаровиот закон останува на сила, а целосното укинување би барало гласање во Конгресот.

За Ахмед ал-Шара, тоа е неверојатен пресврт – поранешен командант на бунтовниците за чија глава американската влада нудеше награда од 10 милиони долари, а сега е пречекан во Вашингтон како почесен гостин.

Минатиот четврток, САД го предводеа гласањето во Советот за безбедност на ОН за укинување на личните санкции против Ал-Шара. Во септември, тој, поранешен џихадист некогаш поврзан со Ал Каеда, стана првиот сириски претседател по децении што се обратил пред Генералното собрание на ОН во Њујорк.

Портпаролката на Белата куќа, Керолин Луит, изјави дека посетата во понеделник е „дел од дипломатските напори на претседателот да се сретне со сите низ целиот свет во обид да се постигне мир“, пренесе “TRTworld”.