САД нема да го нападнат Гренланд, но испраќаат јасна порака, смета Мелони

Италијанската премиерка Џорџа Мелони денеска изјави дека не верува оти САД би употребиле воена сила за анексија на Гренланд, предупредувајќи дека таков потег би имал сериозни последици за НАТО.

На нејзината традиционална новогодишна прес-конференција, Мелони додаде дека е потребно „сериозно и значајно“ присуство на НАТО во арктичкиот регион, вклучително и во Гренланд.

„Сè уште не верувам во хипотезата дека САД би започнале воена акција за преземање на контролата врз Гренланд, опција што очигледно не би ја поддржала“, рече Мелони.

„Верувам дека тоа не би било во ничиј интерес. Не мислам дека би било во интерес на САД, да бидеме јасни“, додаде италијанската премиерка.

Воената операција на САД со која беше соборен лидерот на Венецуела ги обнови загриженостите за намерите на САД кон Гренланд. Белата куќа во вторник објави дека САД разгледуваат неколку опции за преземање на Гренланд, вклучително и употреба на воена сила.

Мелони, која се смета за еден од најблиските сојузници на американскиот претседател Доналд Трамп во Европа, рече дека „на сите им е јасно“ дека секој потег на САД во врска со Гренланд значително би влијаел на НАТО. Таа додаде дека ова е и причината зошто не верува дека Вашингтон ќе ги исполни своите закани.

Сепак, таа рече дека е важно НАТО да го зајакне своето присуство во арктичкиот регион, како и да ги разбере загриженостите на САД за потребата да се спречи „прекумерно мешање од други актери кои би можеле да бидат непријателски настроени“.