САД имаат трифазен план за Венецуела: „Ќе продолжиме да ги диктираме одлуките на венецуелските власти“

Портпаролката на Белата куќа, Каролина Ливит, изјави во среда дека САД „ќе продолжат да ги диктираат“ одлуките на венецуелските власти.

„Остануваме во тесна координација со преодните власти и САД ќе продолжат да ги диктираат нивните одлуки“, рече таа на прес-конференција.

„Јасно е дека имаме максимална моќ врз привремените власти“, додаде таа.

Американските сили упаднаа во Каракас пред зори во саботата и го уапсија претседателот Николас Мадуро и неговата сопруга. Тие беа однесени во Њујорк за да се соочат со судење по обвиненија за наркотероризам.

Венецуелската војска го призна потпретседателот Делси Родригез за привремен претседател на земјата во неделата, а државниот секретар Марко Рубио претходно изјави дека САД имаат план од три фази за Венецуела.

Првата фаза вклучува стабилизирање на земјата откако американските сили го заробија Мадуро во саботата, втората, наречена фаза на „закрепнување“, треба „да обезбеди американските, западните компании и другите да имаат пристап до венецуелскиот пазар на фер начин“, додека третата ќе биде транзицијата, објасни тој.

Каролин Ливит повтори дека од гледна точка на Вашингтон во моментов е прерано да се зборува за организирање избори во Венецуела.

Портпаролката, исто така, рече дека Доналд Трамп ќе се сретне со раководителите на големите американски нафтени компании во петок за да разговараат за „огромните можности“ во Венецуела.

Што се однесува до Гренланд, таа рече дека потенцијалното купување на островот од страна на САД активно се дискутира од страна на претседателот Трамп и неговиот тим за национална безбедност.

„Сите опции се секогаш на маса за претседателот Трамп… првата опција на претседателот отсекогаш била дипломатија“, рече таа на редовниот брифинг за медиумите.

Белата куќа во вторник соопшти дека не ја исклучува воената опција за Гренланд.