САД им ги укинаа визите на палестинските претставници пред седницата на ОН

Палестинската самоуправа (ПА) вечерва изрази „длабоко жалење и разочарување“ поради одлуката на Вашингтон да ги поништи визите пред сеедницата на Генералното собрание на ОН следниот месец, повикувајќи ги САД да ја поништат одлуката.

Во соопштението на ПА се вели дека одлуката на САД е спротивна на меѓународното право и Договорот за седиштето на ОН, особено затоа што „Државата Палестина е членка набљудувач на Обединетите нации“, објави Вафа. Палестинското претседателство ја повика американската администрација да ја преиспита и поништи одлуката, потврдувајќи ја целосната посветеност на Палестина на меѓународното право, резолуциите на ОН и обврските за мир.

„Стејт департментот“ претходно денес објави дека САД ги одбиваат и поништуваат постојните визи за членовите на ПЛО и Палестинската самоуправа (ПА) пред Генералното собрание на ОН во септември.

Ограничувањата значат дека палестинскиот претседател Махмуд Абас, кој управува со окупираниот Западен Брег, веројатно нема да може да отпатува во Њујорк за да се обрати на годишниот собир, како што обично прави, објави „Ројтерс“.

„Палестинската власт, исто така, мора да ги прекине своите обиди да ги заобиколи преговорите преку меѓународни правни кампањи, вклучително и жалби до Меѓународниот кривичен суд и Меѓународниот суд на правдата, како и напорите за обезбедување еднострано признавање на палестинската држава“, се вели во соопштението на „Стејт департментот“.