САД го одложи запленувањето на уште еден венецуелски танкер – немаат доволно ресурси

Крајбрежната стража на САД продолжува со потрагата по танкер за нафта поврзан со Венецуела, но чека засилување пред да се обиде да се качи на бродот и да го заплени. Потрагата по танкерот, идентификуван како Бела 1, трае од неделата. Бродот одби да дозволи качување, што значи дека операцијата веројатно ќе мора да ја спроведе еден од само двата специјализирани тима, познати како Тимови за одговор на поморска безбедност, објави Ројтерс.

Тие се обучени да се качуваат на бродови во такви околности, вклучително и со спуштање јажиња од хеликоптери. Повеќедневната драма на море ја истакнува разликата помеѓу желбата на администрацијата на Трамп да заплени санкционирани танкери и ограничените ресурси на крајбрежната стража, која е задолжена за спроведување на вакви операции. За разлика од американската морнарица, крајбрежната стража има овластувања за спроведување на законот, кои вклучуваат качување и запленување на бродови под санкции на САД.

Да потсетиме, Трамп претходно овој месец нареди „блокада“ на сите санкционирани танкери што пловат кон или од Венецуела, најновиот потег на Вашингтон за зголемување на притисокот врз претседателот Николас Мадуро. Во последните недели, крајбрежната стража веќе заплени два танкери за нафта.

Ограничени ресурси
По првото заплена на 10 декември, американскиот државен обвинител Пам Бонди објави видео на кое се гледаат вооружени специјални сили како се спуштаат на бродот од два хеликоптери. Американски функционер, кој зборуваше под услов да остане анонимен, рече дека специјалните сили биле стационирани на носачот на авиони Џералд Форд, премногу далеку од Бел 1 за да интервенираат.

„Постојат ограничен број на тимови кои се обучени да вршат вакви видови на влегувања“, рече Кори Ранслем, поранешен член на крајбрежната стража и извршен директор на фирмата за поморска безбедност „Драјад Глобал“. Министерството за внатрешна безбедност, кое ја надгледува крајбрежната стража, не одговори веднаш на барањето за коментар.

Не е познато дали постојат други причини зошто бродот сè уште не е запленет, а администрацијата на крајот може да се откаже од својот план. Белата куќа соопшти дека САД продолжуваат „активно да гонат санкциониран брод од „темната флота“ кој е дел од нелегалното избегнување на санкциите од страна на Венецуела“.

Криза на подготвеност
Иако САД собраа значителни воени сили во Карибите, вклучувајќи носач на авиони и воени бродови, крајбрежната стража, гранка на вооружените сили, но под Министерството за внатрешна безбедност, има многу помалку ресурси.

Службата долго време предупредуваше дека ѝ недостасуваат ресурси за ефикасно извршување на растечки спектар на мисии, од операции за пребарување и спасување до запленување на дрога. На пример, во ноември, крајбрежната стража објави дека запленила околу 22 тони дрога во вредност од повеќе од 362 милиони долари во источниот Пацифик.

„Крајбрежната стража е во сериозна криза на подготвеност која се создава со децении“, изјави во јуни адмиралот Кевин Ландеј, кој ја предводи крајбрежната стража. „Нашата крајбрежна стража е помалку подготвена од кога било во последните 80 години од крајот на Втората светска војна. Спиралата на подготвеност во која се наоѓаме не е одржлива“, рече Ландеј претходно оваа година. За фискалната година што завршува во септември 2026 година, крајбрежната стража побара 14,6 милијарди долари и ќе добие дополнителни 25 милијарди долари преку сеопфатен закон за трошење.