Американскиот амбасадор во Израел, Мајк Хакаби, ги повика вработените во амбасадата кои сакаат да заминат да го сторат тоа „денес“ поради страв од можен ирански напад. Стејт департментот, исто така, го ажурираше своето предупредување за патување, советувајќи ги американските граѓани да не патуваат во Израел, објави „Џерусалем пост“ .
Според извештајот на „Њујорк тајмс“, Хакаби испратил е-пошта до персоналот на амбасадата во петокот во 00:04 часот, повикувајќи ги да резервираат летови каде и да можат за да ја напуштат земјата.
Стејт департментот официјално го одобри заминувањето од Израел на владини службеници на несуштински должности и на членовите на нивните семејства. Во општо соопштение, на американските граѓани им се препорачува „да размислат за напуштање на Израел додека се достапни комерцијални летови“.
Со зголемувањето на тензиите меѓу Иран и САД и веројатноста за ескалација на вооружен конфликт, и други земји, како на пример Канада и Кина ги повикаа своите граѓани да го напуштат Блискиот Исток или да не патуваат во регионот во следните денови.
