Оптимистична и ексцентрична како и секогаш, особено по својот успех, белоруската тенисерка Арина Сабаленка направи нешто необично дури и за своите стандарди по освојувањето на титулата на турнирот во Бризбејн. Таа индиректно му предложи брак на своето момче, бразилскиот бизнисмен Георгиос Франгулис, чие семејство се пресели во Саун Пауло од Солун.
– Му благодарам на моето момче, се надевам дека наскоро ќе можам да го наречам поинаку, нели? Само правам дополнителен притисок – јавно, со смеа, му испрати порака на церемонијата на доделување на купот.
Дали ги разбра нејзините зборови не е јасно, но тој изгледаше многу збунето.
Секогаш многу отворена, никогаш не ги крие своите емоции, дури и кога се на нејзина штета, таа е една од најекстровертните тениски кралици на сите времиња. Млада, убава, успешна, насмеана, таа знае како да ужива во животот и не го крие тоа.
По финалето во Бризбејн, успеа да сврти непријатна ситуација во своја корист. Кога беше игнорирана од Марта Костјук од Украина, таа одговори, честитајќи ѝ за одличната игра и посакувајќи нови успеси, што ѝ донесе голем аплауз од трибините.
– Тоа е нејзин став, што можам да направам? Кога сум на терените, мислам само како да победам. Не ме интересира кој ми е противник. Играм како спортистка, што и сум, и не морам никому ништо да му докажувам.
Таа не е одговорна за фактот каде е родена, ниту за политиката на својата земја. Впрочем, постојано истакнуваше дека е против сегашниот режим во Минск, како и против војната во Украина. Во текот на протестите на белоруската опозиција во 2020/2021 година, таа го критикуваше Александар Лукашенко за разбивање, иако подоцна беше критикувана од опозицијата за недоволно ангажирање.
Кога станува збор за војната во Украина, најдобрата тенисерка во светот никогаш не го крие својот став:
– Да можам да ја сопрам војната, веднаш би го направила тоа, но тоа не зависи од мене. Ниту еден од белоруските илиод руските спортисти не ја поддржува војната. Никој нормален не го прави тоа. Не сакам мојата земја да биде во никаков конфликт. Не ја поддржувам војната и затоа не го поддржувам Лукашенко – рече Сабаленка.
Сабаленка и Франгулис почнаа да се забавуваат во 2024 година и тој е десет години постар од неа.
