Руски режимски медиум објави „листа на најголеми непријатели“

Рускиот режимски медиум „Взгљад“ објави рангирање на земјите кои, според нив, претставуваат најголема или најмала „закана“ за интересите на Русија.

Според овој „рејтинг на непријателски влади“, Велика Британија го зазеде првото место со 75 поени. Како причини ги наведуваат санкциите врз руските нафтени компании, активното застапување за трансфер на руски средства во Украина и снабдувањето со оружје во Киев.

Германија и Франција го делат второто место со индекс од 70 поени. „Взгљад“ наведува дека обете земји се членки на Европската Унија и активно обезбедуваат финансиска помош на Украина. Четвртото и петтото место ги зазедоа Холандија и Естонија со 65 поени.

Соединетите Американски Држави се на шестото место со 55 поени, по што следат Данска, Италија, Канада, Литванија, Полска, Финска и Шведска со по 50 поени. Норвешка и Белгија го зазедоа 15-то и 16-то место со 45 поени.

Според овој рејтинг на 17-то место се најде БиХ, заедно со Хрватска, Шпанија и Грција, сите со 40 поени. Португалија и Словенија се пониско рангирани со 35 поени, додека Унгарија и Луксембург ги заземаат последните позиции со по 30 поени.

Овој „рејтинг“ на Взгљад претставува обид на руската пропаганда да ја претстави меѓународната политичка сцена низ призмата на наводна непријателска политика кон Русија, додека аналитичарите истакнуваат дека ваквите листи служат повеќе како политички инструмент отколку како објективна проценка.