Руското Министерство за одбрана објави дека стратешките бомбардери Ту-95, кои можат да носат нуклеарно оружје, извршиле „планиран“ лет над меѓународните води на Баренцовото и Норвешкото Море. За време на мисијата, како што е наведено, авионите биле придружувани од ловци од други земји на одредени делови од рутата. Во официјалното соопштение не е прецизирано кога е извршен летот или кои странски воздухопловни сили учествувале во придружбата, објавува „Киев пост“.
– Стратешките ракетни носачи Ту-95МС извршиле планиран лет над неутралните води на Баренцовото и Норвешкото Море – се наведува, со појаснување дека станува збор за област северно од Скандинавија и северозападно од Русија.
Исто така, се додава дека „во одредени фази од рутата, бомбардерите со долг дострел биле придружувани од ловци на странски земји“. Москва вели дека ваквите летови се извршуваат редовно во различни делови од светот и се целосно во согласност со меѓународните правила.
Ова беше објавено кратко откако Јужна Кореја и Јапонија одговорија на руските и кинеските летови во близина на нивниот воздушен простор претходно овој месец, со што ги кренаа своите ловци.
Според Токио, два руски бомбардери Ту-95 потоа прелетале над Јапонското Море и се сретнале со два кинески бомбардери Х-6 над Источнокинеското Море, по што заеднички спровеле патролен лет околу Јапонија.
