Кениската влада тврди дека повеќе од 200 нејзини граѓани се приклучиле на руската страна во војната во Украина. Мусалија Виклиф Мудавади, министер за надворешни работи и дијаспора, изјави дека властите добиваат сè повеќе извештаи за граѓани кои, под изговор за вработување во странство, завршиле како борци на фронтот во Украина, пренесува агенција Анадолија.
„Според нашите информации, повеќе од 200 Кенијци се приклучиле на руските вооружени сили. Меѓу нив има и поранешни членови на кениските безбедносни сили“, рече Мудавади.
Тој нагласи дека разузнавачките информации покажуваат дека активностите на Русија за регрутирање странски борци се прошируваат, што сега вклучува и граѓани на африкански земји. Ситуацијата во Кенија е загрижувачка, а министерот ги повика граѓаните да ги разгледаат понудите што звучат премногу добро за да бидат вистинити.
Кенискиот претседател Вилијам Руто разговараше со украинскиот претседател Володимир Зеленски минатата недела и повика на ослободување на кениските граѓани заробени во зоната на конфликтот.
Слични проблеми се пријавени и од други африкански земји. Владата на Јужна Африка претходно објави дека се обидува дипломатски да врати 17 свои граѓани, кои мислеле дека добиле одлична работа, но на крајот останале заробени во Донбас.
Повеќе од 1.400 граѓани од 36 африкански земји моментално се борат на руска страна во Украина, тврди украинскиот министер за надворешни работи Андрија Сибихе.
