Русија стана прва земја што ја призна талибанската влада во Авганистан

Русија соопшти дека ги прифатила акредитивите на новиот амбасадор во Авганистан, со што стана првата земја што ја призна талибанската влада во таа земја.

Руското Министерство за надворешни работи изјави дека Москва гледа добри перспективи за развој на врските и ќе продолжи да го поддржува Кабул во безбедноста, борбата против тероризмот и борбата против криминалот поврзан со дрога, пренесе Ројтерс. Москва, исто така, гледа значајни трговски и економски можности, особено во енергетиката, транспортот, земјоделството и инфраструктурата.

-Веруваме дека чинот на официјално признавање на владата на Исламскиот емират на Авганистан ќе даде поттик за развој на продуктивна билатерална соработка меѓу нашите земји во различни области, објави Министерството.

Авганистанскиот министер за надворешни работи, Амир Кан Мутаки, изјави: „Го цениме овој смел чекор на Русија и, ако даде Бог, тој ќе послужи како пример за другите“.

Ниту една друга земја формално не ја признала владата на талибанците, која ја презеде власта во август 2021 година, кога силите предводени од САД спроведоа хаотично повлекување од Авганистан по 20 години војна. Сепак, Кина, Обединетите Арапски Емирати, Узбекистан и Пакистан назначија амбасадори во Кабул, што е чекор кон признавање.