Русија е подготвена да продолжи со сериозни директни преговори со Украина

Постојаниот претставник на Русија во Обединетите нации, Василиј Небензја, вечерва изјави дека Русија е подготвена да продолжи со сериозни директни преговори со Украина.

„Имаме намера да продолжиме да дејствуваме на овој начин и сме решени да го продолжиме сериозниот процес на директни преговори со Украина што беше прекинат во април 2022 година на иницијатива на британскиот премиер Борис Џонсон и неговите русофобни соработници“, рече Небензја на состанокот на Советот за безбедност на ОН, објави „РИА Новости“.

Небензја нагласи дека изборот сега лежи на Украина помеѓу мир како резултат на преговори или „неизбежен пораз на бојното поле со различни услови за завршување на конфликтот“.

Рускиот дипломат истакна дека дури и новите санкции против Русија нема да го спречат поразот на Украина, ниту на режимот на украинскиот претседател Володимир Зеленски.

„Додека Киев се обидува да ја продолжи војната и да ја провоцира Русија со напади врз станбена и цивилна инфраструктура на наша територија, ние ќе ја продолжиме нашата специјална воена операција и ќе уништуваме објекти поврзани со воениот потенцијал на режимот во Киев. И никакви нови антируски санкции, снабдување со оружје за Украина или други непријателски чекори кон Русија нема да го спречат неизбежниот воен пораз на режимот на Зеленски“, рече Небензја.