Рубио: САД го поддржуваат храбриот народ на Иран

Претседателот на САД, Доналд Трамп, претходно изјави дека САД внимателно ја следат ситуацијата со протестите во Иран и дека САД ќе „удрат силно“ ако властите во земјата почнат да убиваат демонстранти

Државниот секретар на САД, Марко Рубио, денес ја изрази поддршката на САД кон народот на Иран, откако иранските власти го исклучија интернетот за да ги потиснат антивладините протести низ целата земја.

„САД се со храбриот народ на Иран“, напиша Рубио во објава на социјалната мрежа „Икс“, објави „Ројтерс“.

Претседателот на САД, Доналд Трамп, претходно изјави дека САД внимателно ја следат ситуацијата со протестите во Иран и дека САД ќе „удрат силно“ ако властите во земјата почнат да убиваат демонстранти.

„Внимателно ја следиме ситуацијата. Јасно ставив до знаење дека ако почнат да убиваат луѓе како што правеа во минатото, ние ќе интервенираме. Ќе ги удриме многу силно таму каде што ги боли“, рече Трамп.

Протестите во Иран, кои започнаа на 28 декември, се проширија во услови на политички тензии, додека собири во поддршка на властите беа организирани како одговор на демонстрациите.

Иранскиот претседател Масуд Пазахстани претходно го призна постоењето на јавно незадоволство, наведувајќи дека владата е одговорна за моменталните економски проблеми и ги повика властите да не ги обвинуваат надворешните фактори како што се САД за ситуацијата во земјата.

Активистите објавија видеа од протестите во делови од Техеран, како и во градовите Исфахан, Машхад, Керманшах, Арак и Бабел, каде што демонстрантите извикуваа слогани против владата, со големо присуство на безбедносните сили.

Протестите избувнаа поради зголемувањето на цените и влошувањето на животниот стандард, откако вредноста на националната валута падна на рекордно ниско ниво. Овие протести претставуваат најголеми демонстрации во Иран од 2022 и 2023 година, по смртта на Махса Амини додека беше притворена од полицијата за морал поради наводно кршење на кодексот на облекување, јавува „Танјуг“.