Романија денес крена борбени авиони откако дрон влезе во нејзиниот воздушен простор за време на руски напад врз украинската инфраструктура во близина на границата, соопшти Министерството за одбрана.
Романија, членка на Европската Унија и НАТО, која дели граница со Украина од околу 650 километри, веќе постојано се соочува со остатоци од руски беспилотни летала што паѓаат на нејзина територија како дел од руските напади врз пристанишната инфраструктура на украинската страна.
Министерството соопшти дека радарот прво го детектирал сигналот на дронот кога тој веќе влегол околу осум километри во романскиот воздушен простор, во близина на селата Периправа и Чилија Вече во округот Тулча.
Потоа сигналот исчезна од радарот пред да почне спорадично да се појавува 12 минути подоцна, во близина на село во округот Галаци, додаде министерството.
Романија испрати два борбени авиони „Еурофајтер“ кои припаѓаат на германската мисија за надзор на воздушниот простор, проследени со два романски авиони „Ф-16“, и ги предупреди граѓаните на југоисточните окрузи Тулча и Галаци да побараат засолниште.
Министерството додаде дека сè уште не добило извештаи дека беспилотни летала паднале на романска територија.
