Роберт Редфорд имал детска парализа, бил член на банда, изгубил два сина…

Иако е запишан во историјата како еден од најголемите актери на сите времиња, зад сцената тој преживеал низа трагедии. Во неговата биографија од 2011, напишана од Мајкл Фини Калан, беше откриено дека Редфорд имал полесен случај на детска парализа. Бил член на улична банда наречена „Барони“ во средно училиште, а по само 18 месеци бил исфрлен од колеџ…

Од борбата со детската парализа до губењето на двата сина… Животот на холивудската легенда Роберт Редфорд, кој почина завчера на 89 годишна возраст, не бил секогаш гламурозен. Иако е запишан во историјата како еден од најголемите актери на сите времиња, зад сцената тој преживеал низа трагедии кои несомнено влијаеле на неговата кариера. Во неговата биографија од 2011 година напишана од Мајкл Фини Калан, беше откриено дека Редфорд добил полесен случај на детска парализа откако пливал во океанот. Актерот ја добил болеста пред Џонас Салк да ја развие вакцината и масовно да ја произведе во 1950-тите и 1960-тите. Подоцна ќе му оддаде почит на Салк во 3Д документарецот „Катедрали на културата“, во кој режираше сегмент за Институтот Салк во Калифорнија.

 Член на банда и исклучен од колеџ поради пиење

Роден и израснат во Јужна Калифорнија, Редфорд се приклучил на улична банда наречена „Барони“ во средно училиште. Според книга од 2011, тој бил уапсен за „позајмување автомобил со украден накит во багажникот“. Редфорд го посетувал средното училиште „Ван Најс“ во Лос Анџелес, Калифорнија, а подоцна се запишал на Универзитетот во Колорадо во Болдер. Тој студирал со стипендија за бејзбол и се приклучил на братството „Капа Сигма“, но наскоро се свртел кон забави, пиење и возење мотоцикли наместо кон академски студии. Во 1990, актерот им открил на медиумите дека ја изгубил стипендијата за бејзбол поради неговиот начин на живот, а по само 18 месеци бил исфрлен од колеџ.

На 18 години ја загубил мајка си, а потоа и двата сина

Таткото на Редфорд, Чарлс Редфорд, работел како млекар пред да стане сметководител во Стандард Оил во Калифорнија. Неговата мајка Марта Харт починала во 1955 кога тој имал 18 години. Пред смртта, неговата мајка родила близнаци кои починале кратко по раѓањето. Подоцна развила крвно нарушување поради трауматско породување и доживеала фатално крварење на 40-годишна возраст.

„Таа беше прекрасна личност. Почина многу млада. Беше полна со живот, полна со смеа, полна со љубов. Ме научи да возам автомобил кога имав 10 години, а никој не знаеше за тоа. Имавме блиска врска, но исто така, бев како и сите други деца на мои години. Не сакав внимание или нешто слично, а имав мајка која сакаше да ми го посвети тоа внимание. Жал ми е поради тоа“, рекол во една прилика Редфорд. Тој ја нарекол нејзината смрт „неправедна“ и подоцна ѝ оддал почит на Филмскиот фестивал Санденс во 2018 во Јута. Сепак, тој призна дека смртта на неговата мајка му овозможила сам да донесува одлуки за својот живот.

Во разговор за медиуми во 2017, Редфорд изразил жалење што не можел да ѝ се заблагодари на мајка си за нејзиното постојано охрабрување.

 Студирал уметност во Париз, што на крајот го довело до глума

По смртта на неговата мајка и неговото исклучување од колеџ, Редфорд ја искористил можноста да патува низ светот. Студирал уметност во Париз, што на крајот го довело до глума.

Редфорд се здоби со светска слава благодарејќи на неговите улоги во филмовите „Буч Кесиди и Санденс Кид“, „Бодежот“, „Моја Африка“, „Непристоен предлог“, „Шпионски игри“, „Големиот Гетсби“, „Три дена на кондорот“, „Сите луѓе на претседателот“. Неговата кариера не застана само на глумата – во 1980 освои Оскар за режија на филмот „Обични луѓе“. Добитник е и на други бројни признанија како БАФТА, две награди „Златен глобус“, Наградата „Сесил Б. Демил“…

Изгубил два сина, ќерката доживеала тешка сообраќајна несреќа

По патувањето низ Европа, Редфорд се вратил во САД, каде што ја запознал Лола Ван Вагенен. Тие се венчале во 1958, токму кога неговата актерска кариера почнувала да се развива. Двојката го добила својот прв син, Скот, кој починал само два ипол месеци подоцна.

„Тоа беше тежок удар. Тоа беше нашето прво дете. Бевме во Њујорк и немавме пари. Беше навистина тешко“, рече актерот. Тој им објаснил на медиумите дека со неговата сопруга имале само 20 години и дека „не биле подготвени да се справат со смртта на бебето“. Кога го прашале дали тагата поради загубата на неговиот син е видлива во неговата работа, Редфорд признал дека таа „веројатно се покажува на секакви мали начини за кои тој дури и не е свесен“. Со неговата прва сопруга имале уште три деца: ќерките Шона и Ејми, и синот Џејми. Тој и Лола се развеле во 1985 по 27 години брак. Со текот на годините, неговото семејство преживеало низа ужасни инциденти. Момчето на неговата ќерка Шона, Сидни Ли Велс, било убиено во Колорадо, а потоа таа преживеала ужасна сообраќајна несреќа во која нејзиниот автомобил паднал во вода, додека таа била внатре.

На неговиот син Џејми како бебе му била дијагностицирана респираторна болест, а подоцна развил колитис, воспалително заболување на цревата што пак,  предизвикало проблеми со црниот дроб и цироза. Во октомври 2020, починал од рак на црниот дроб на 58-годишна возраст.

Омилен кај жените

Роберт Редфорд се сметаше за омилен кај жените и голем холивудски заводник, но неговото срце го „зароби“ 21 година помладата Сибил Сагарс. Ја запознал во 1996, а во брак беа од 2009 година. Таа е уметница за која тој рече дека му го променила животот. Се што е познато за нивната свадба е дека се одржала во Хамбург, а двојката никогаш не сакаше да споделува детали од нивниот приватен живот.

„Таа е многу посебна личност. Помлада е од мене и е Европејка, што ми се допаѓа. Тоа е сосема нов живот за мене“, рече еднаш актерот.

Роберт Редфорд не живееше како типична холивудска ѕвезда, ретко се појавуваше на јавни настани, поради што сите сè уште се сеќаваат кога беше со својата сопруга Сибил во 2021 на годишната церемонија на доделување награди за неговата посветеност на зачувувањето на животната средина и здравјето на планетата, организирана од принцот Алберт II од Монако.

Богатството на Редфорд – 200 милиони долари

Освен што оставил неизбришлив белег во филмската индустрија, Роберт Редфорд  оставил зад себе и огромно богатство, а неговиот имот се проценува на околу 200 милиони долари. Неговата кариера траеше повеќе од шест децении, а се здоби со слава во филмови како „Буч Касиди и Санденс Кид“, „Столото“, „Сите луѓе на претседателот“ и „Надвор од Африка“. Тој го освои Оскарот за најдобар режисер во 1981 за „Обични луѓе“, а одигра значајна улога како основач на Институтот Санденс и Филмскиот фестивал Санденс.

Иако неговите приходи од глума и режија беа високи, неговите деловни активности поврзани со проектот Санденс, исто така, одиграа важна улога во неговиот финансиски успех. За време на кариерата што траеше повеќе од 50 години, Редфорд заработи стотици милиони долари од глума, режија, продуцирање и бројни деловни потфати. Според јавно достапните информации, неговото вкупно богатство се проценува на околу 200 милиони долари.

Неговата рекордна основна плата била 11 милиони долари за „Последниот замок“ (2001). Покрај неговите хонорари, значителни средства доаѓаа од авторски права, режисерски проекти како што се „Обични луѓе“ и „Квиз шоу“, како и приходи генерирани од Институтот Санденс и неговите поврзани активности. Поседувал и импресивно портфолио на недвижнини. Меѓу најпознатите имоти беше ранчот во близина на Санденс, Јута, познат и по снимањето на „Шепотот на коњите“.

Поседувал и големи земјишни поседи во Јута. Неговиот поранешен имот во долината Напа, познат како „Данца дел Сол“, се простирал на десет хектари и ја одразувал неговата силна врска со природата и уметноста…

Неговите колеги велат „Малкумина имаат направено повеќе за американското општество од него“.