„Ристо Шишков“ за Биљана Драгиќевиќ-Пројковска; Награда за највисоко актерско остварување

Актерката Драгиќевиќ Пројковска наградата на 33. издание на фестивалот на камерен театар „Ристо Шишков“, ја доби за улогата Корин Фел во претставата „Гидионовиот јазол“ во продукција на Драмски театар Скопје. Фестивалот се одржа од 8 до 13 септември во Струмица, а наградата се состои од златен медалјон со ликот на големиот македонски актер Ристо Шишков

Највисокото признание на 33. издание на фестивалот на камерен театар „Ристо Шишков“, награда за највисоко актерско остварување, ја доби Биљана Драгиќевиќ-Пројковска за улогата Корин Фел во претставата „Гидионовиот јазол“ во продукција на Драмски театар Скопје. Фестивалот се одржа од 8 до 13 септември во Струмица, а наградата се состои од златен медалјон со ликот на Шишков, парична награда од 1.500 евра и од плакета.

Жири-комисијата на 33. издание на Меѓународниот фестивал на камерен театар „Ристо Шишков“ во состав: Лео Долорес Поповиќ, актер, како претседател на жири-комисијата, и Анастас Попдимитров, актер и режисер, и Иван Додовски, универзитетски професор и драмски автор – како членови на жири-комисијата, одгледа 12 претстави селектирани во конкуренција за единствената награда за највисоко актерско остварување што го носи името на големиот македонски актер Ристо Шишков.

Во одлуката на жири-комисијата се вели: „Во улогата на Корин Фел, мајка што трага по одговори за смртта на својот син, Биљана Драгиќевиќ-Пројковска покажува фасцинантна доследност и суптилна самоконтрола во водењето на ликот, остварувајќи моќна и осмислена улога“.

„Гидионовиот јазол“ на режисерката Драгана Милошевски-Попова е претставата работена по текст на авторката Џона Адамс. Драматург на претставата е Викторија Рангелова-Петровска.

Улогите ги играат актерите: Биљана Драгиќевиќ-Пројковска, Ања Митиќ и децата од Студиото за актерска игра „Прва проба“: Саша Димитриевска, Леа Стојков, Мина Ѓаку, Ина Прокоповска, Катја Бешлиева, Бистра Стефановска, Јана Нешевска, Матеј Марковски, Јоанис Далајоргос.

Режисерката Драгана Милошевски-Попова во програмската белешка истакнува дека: „Претставата „Гидионовиот јазол“ е моќна и вознемирувачка приказна за вината, одговорноста, тагата и сложениот однос во комуникацијата, како и состојбите во образовниот систем, проблемите со кои се соочува детето низ периодот на детството. На училишна средба меѓу мајката Корин и наставничката Хедер, кој се случува по еден трагичен настан, преку деликатен, емотивно исполнет/напнат дијалог, се отвораат прашањата за детската креативност, слободата на изразување, за уметноста, за одговорноста на наставниците и за родителите, за социјалните мрежи, за врсничкото насилство, за осаменоста, преку кои постепено се разоткрива длабоката болка и се бара, па и се посочува можниот виновник“.

Авторката Џона Адамс е претставничка на новата генерација американски драмски автори. Таа е авторка на 20 драмски текстови во кои драмската структура ја гради преку исклучително јаки и богато нијансирани карактери и ги поставува во сложени меѓусебни психолошки ситуации. Друштвото на американските театарски критичари ѝ ја доделува наградата „Стинберг“ (Steinberg Award) за делото „Гидионовиот јазол“.

Премиерата на претставата „Гидионовиот јазол“ беше во мај годинава.

– Поради универзалноста и актуелноста на темата во денешниот современиот и динамичен живот, претставата е одлично примена кај публиката на матичната сцена во Драмски, но забележителен успех постигна и на гостувањето во Сараево во рамките на РУТА-фестивалот во мај годинава, посочуваат од Драмски.

Традиционално, Меѓународниот фестивал на камерен театар „Ристо Шишков“ почнува на Денот на независноста, а завесата на 33. издание годинава ја кренаа актерите од НТ „Антон Панов“ – Струмица со претставата „Синот“ од Флоријан Зелер, во режија и сценографија на Благој Мицевски. Во рамки на програмата на фестивалот беа изведени камерни театарски остварувања на МНТ, Драмскиот театар од Скопје, Народниот театар од Битола, Кумановскиот театар и Театарот „Јордан Хаџи Константинов-Џинот“ од Велес, како и монодрами и копродукциски проекти. Фестивалот се одржа во Центарот за култура „Антон Панов“, со финансиска поддршка од Министерството за култура и туризам и од Општина Струмица.