Рим со построги правила во 2026, подгответе повеќе пари

Европската метропола Рим, која секоја година привлекува огромен број туристи, во 2026 влегува во нова ера на дигитализација, построги правила за пристап до знаменитостите и унапредена инфраструктура. Според надлежните, главна причина за промените е огромниот притисок врз градот и животот на локалното население.

Ако планирате посета во 2026 година, еве ги клучните работи што треба да ги имате на ум, според пишувањето на фејсбук-страницата „Heritance Italy“.

Рим повеќе не е град во кој може спонтано да се движите и да ги посетувате знаменитостите. Треба претходно внимателно да го испланирате вашето патување.

Колосеум – персонализирани билети и борба против препродавачите

Претходно можевте да купите билет кај уличните продавачи, но во 2026 година тоа ќе биде минато. Сите билети за Колосеумот сега се строго номинални. При влез мора да покажете личен документ што се совпаѓа со името на билетот. Билетите се купуваат речиси исклучиво преку официјалната веб-страница или апликација. Поради ограничениот број посетители, билетите за популарните термини во сезона се распродаваат за неколку минути, обично 30 дена однапред.

Пантеон – крај на бесплатните посети и задолжителна резервација

Пантеонот, кој со години беше бесплатен за посетителите, сега функционира по системот на наплата на влезници. Билетот чини пет евра, додека за викенд е задолжителна претходна онлајн резервација. Во текот на работните денови, дигиталната резервација станува препорачлива, а понекогаш и задолжителна, за да се избегне голем метеж на плоштадот „Piazza della Rotonda“.

Нова зона на ниски емисии

Рим воведува еден од најстрогите еколошки режими во Европа. Ако доаѓате со автомобил, бидете особено внимателни.

– Поголемиот дел од центарот е во зона на ниски емисии. Постарите дизел и бензински возила нема да можат да влезат.

– Од 2026 година, целокупниот градски обрач ќе биде под надзор на паметни камери, кои автоматски ги читаат регистарските таблици и издаваат високи казни ако возилото не ги исполнува стандардите.

– Избегнувајте возење до центарот, паркирајте на периферијата (на пример, покрај станиците на метрото) и користете јавен превоз.

Фонтана ди Треви – 2 евра за директен пристап

Од февруари 2026, за пристап до долниот дел на фонтаната, веднаш до водата, ќе бидат потребни резервација и плаќање од 2 евра. Горниот дел на плоштадот останува бесплатен, но метежот ќе биде голем, бидејќи ќе се контролира движењето за да се спречи задушување на тесните премини.

Возење во центарот – ZTL „Centro“ станува зона 30

Во рамките на централната ZTL-зона, ограничувањето на брзината станува 30 км/ч од 15 јануари 2026. Ако изнајмувате автомобил и планирате да возите, очекувајте побавен сообраќај и построга контрола.

Наплата на влезници во музеите што претходно беа бесплатни

Рим ја менува ценовната политика за градските музеи. Од февруари 2026, ќе се наплаќа влез на пет локации што досега беа бесплатни:

– Museo Carlo Bilotti;

– Museo di Scultura Antica Giovanni Barracco;

– Museo Pietro Canonica;

– Museo Napoleonico;

– Villa di Massenzio.

Цената на билетите за овие помали музеи ќе изнесува околу 5 евра. 

Модернизација на јавниот превоз

Линијата метро Ц кај Пјаца Венеција ќе биде во целосна изградба во 2026, што значи дека центарот ќе остане делумно градилиште. Системот Tap&Go (плаќање со картичка директно при влез) сега функционира во сите автобуси, трамваи и метро.