Ревија со македонски филмови за 75 години од основањето на Друштвото на филмски работници на Македонија

Во Кинотеката на Македонија, во првата половина од септември ќе се одржи филмска ревија во чест на јубилејот – 75 години од основањето на Друштвото на филмски работници на Македонија (ДФРМ).

Програмата започнува на 3 септември, со филмот „Трето полувреме“ на Дарко Митревски, а публиката ќе има можност да проследи повеќе избрани македонски филмови што оставиле длабока трага во нашата кинематографија.

Притоа, на 4 септември ќе бидат прикажани „Денес треба нешто да се случи“ (1978) во режија на Миле Грозданоски и „Ругање со Христос“ (2018) во режија на Јани Бојаџи; на 5 септември „Северен пол“ (2021) на Марија Апчевска-Петровска и „Соба со пијано“ (2013) на Игор Иванов-Изи; на 6 септември „Прашина“ на  Милчо Манчевски; на 10 септември „Види ја ти неа“ (2017) и „Домаќинство за почетници“ (2023) – двата на Горан Столевски; на 12 септември „Вирово“ (1968) документарец на Мето Петровски и „Сестри“ (2021) на Дина Дума, а на 13 септември – „До балчак“ на Столе Попов.

– Јубилејната филмска ревија претставува потсетување на 75. години активна работа на Друштвото на филмски работници на Македонија и истовремено – почит кон сите генерации визионери, филмски автори, актери, филмски работници и соработници, кои низ сите овие години ја граделе и сѐ уште ја градат македонската кинематографија. Ревијата отвора простор за средби, дијалози и за нови идеи за иднината на седмата уметност во нашата држава. Во време кога вниманието е фрагментирано, јубилејната ревија нè потсетува дека добриот филм останува моќна сила – да нè трогне, инспирира и обедини – вели Игор Иванов-Изи, претседател на ДФРМ.

Сите проекции се бесплатни, а почнуваат во 20:00 часот.