Рекорден број Украинци побараа засолниште во метрото во Киев за време на големиот ноќен руски напад/ФОТО

Повеќе од 52.000 луѓе побараа засолниште во метрото во Киев за време на големиот ноќен руски напад врз украинската престолнина, што е најголем број регистриран од почетокот на војната, објавија украинските медиуми, повикувајќи се на прес-службата на метрото во Киев.

Според операторот на метрото, 52.500 луѓе, вклучувајќи речиси 4.500 деца, побараа засолниште во станиците преку ноќ.

„Ова е најголем број регистриран во последните години“, се вели во соопштението, пренесува United 24 media.

Киевското метро потсети дека сите 46 подземни станици функционираат како засолништа за време на воздушниот напад и дека сите влезови се отворени за граѓаните.

Рекордниот број луѓе кои бараат засолниште се совпадна со еден од најголемите комбинирани руски воздушни напади врз Киев.

Според украинските власти, во нападот загинаа 20 лица, а 90 беа повредени. Штети се пријавени на 28 локации низ градот, при што најмногу штета претрпеа станбените згради и цивилната инфраструктура.

Меѓу најтешко погодените беше округот Дарницки, каде што директен удар ги уништи првите шест ката од деветкатна станбена зграда. Значителна штета е регистрирана и во областите Соломјански, Шевченковски, Свјатошински и Голосиевски.

Истиот напад, исто така, запали хотел во центарот на Киев откако остатоци од соборени беспилотни летала паднаа врз зградата.

Според украинските воздухопловни сили, Русија користела вкупно 570 воздушни средства преку ноќ, вклучувајќи 74 ракети и 496 беспилотни летала од различни видови, со Киев како главна цел.

Украинската воздушна одбрана соопшти дека пресретнала или електронски онеспособила 476 од 496 дронови, што е стапка на успех од речиси 96 проценти.