Речиси еден милион луѓе евакуирани на Филипините: Доаѓа супертајфун со налети на ветер од 230 километри на час

Супертајфунот Фунг-вонг се приближува кон Филипините во недела, каде што се евакуирани речиси еден милион луѓе, помалку од една недела откако помина разорниот тајфун Калмаеги.

Тајфунот Фунг-вонг, чиј дијаметар ја покрива речиси целата земја, се движи кон архипелагот од исток, со ветрови од 185 км/ч и налети на ветер што достигнуваат 230 км/ч.

Националната метеоролошка служба очекува да стигне до копното преку ноќ.

Речиси еден милион луѓе беа евакуирани
До раните попладневни часови, вкупно 916.863 луѓе беа евакуирани, изјави на прес-конференција службеникот за цивилна заштита Рафаелито Алехандро.

Училиштата и јавните згради ќе останат затворени во поголемиот дел од земјата во понеделник, вклучувајќи го и главниот град Манила, а речиси 300 летови веќе се откажани, соопштија властите.

Брановите почнаа да удираат околу 7 часот наутро по локално време.

Прв што ќе ги погоди Бикол и Лузон
Тајфунот Фунг Вонг – локално познат како Уван – ќе донесе силни ветрови и дожд во неколку области во недела, според метеоролошката служба на државата Пагас. Источниот регион Бикол беше првиот што беше директно погоден од бурата утрово, додека Лузон, најголемиот остров во земјата, се очекува да биде погоден до вечерта.

Тајфунот ги принуди многу училишта да ги откажат часовите за понеделник или да се префрлат на онлајн часови, а Филипините ерлајнс откажаа голем број домашни летови.

Службениците очекуваат Фунг Вонг брзо да ослабне по пристигањето на копното, но веројатно ќе ја задржи силата на тајфунот додека се движи низ Лузон. Жителите во ниските и крајбрежните области, особено на островот Катандуанес, каде што беа регистрирани екстремни услови утрово, се повикани да се евакуираат на повисоки места.

Подготовки на брегот
Во регионот Аурора во источен Лузон, Би-Би-Си разговараше со Хагуној, 21, вработен во еден од десетината хотели по должината на брегот во Сабанг. Тој рече дека локалната полиција патролирала во областа во последните денови за да се осигури дека сите гости се евакуирани пред да удри бурата.

Сите хотели беа празни утрово, а персоналот ги обезбедуваше влезните врати и ги врзуваше прозорците со јаже за да спречи кршење на стаклото. Хагуној рече дека ќе остане да ги чува своите работи што е можно подолго пред да се вози со својот мотор на безбедно.

Спасувачките операции се прекинати
Супертајфунот ќе го погоди архипелагот само неколку дена по Калмаеги, кој според најновите владини бројки предизвика повеќе од 224 смртни случаи во земјата и беше најсмртоносниот тајфун во годината, според специјализираната база на податоци EM-DAT.

Околу дваесет бури или тајфуни ги погодуваат или се приближуваат кон Филипините секоја година, при што најсиромашните региони генерално се најтешко погодени.

Според научниците, климатските промени предизвикани од човековата активност ги прават екстремните временски настани почести, посмртоносни и подеструктивни.

Филипинската влада прогласи состојба на природна катастрофа низ целата земја, што им овозможува на агенциите да имаат побрз пристап до итни залихи и набавка и испорака на основни потреби до оние кои се изложени на ризик.

Страв кај населението
Пустошот што го остави тајфунот Калмаеги ја зголеми вознемиреноста кај жителите пред уште една бура. „Решивме да се евакуираме бидејќи неодамнешниот тајфун донесе поплави во нашето подрачје, а сега само сакам да го заштитам моето семејство“, изјави за новинската агенција АФП Норлито Дуган, еден од многуте што побараа засолниште во црква во градот Сорсогон. Друг жител, Максин Дуган, додаде: „Јас сум тука затоа што брановите во близина на мојата куќа сега се огромни, живеам во близина на брегот. Ветровите се многу силни таму сега и брановите се огромни.“

Земја на патот на бурите
Филипините, поради својата локација во Тихиот Океан, се една од најранливите земји во светот на тропски циклони. Околу 20 тропски циклони се формираат во регионот секоја година, од кои половина директно паѓаат на копно.

Иако се смета дека климатските промени не го зголемуваат бројот на урагани, тајфуни и циклони, потоплите океани и атмосферата имаат потенцијал да ги направат бурите што се формираат значително поинтензивни, што би можело да доведе до посилни ветрови, пообилни врнежи од дожд и поголем ризик од крајбрежни поплави.