Разговорите меѓу Украина и Русија со посредство на САД во Абу Даби започнаа: Претстојните три дена ќе покажат што ќе постигнат

Министерството за надворешни работи на Обединетите Арапски Емирати соопшти дека разговорите меѓу Украина и Русија започнаа во Абу Даби, со посредство на САД.

„Разговорите започнаа денес во Абу Даби и се очекува да траат два дена, како дел од тековните напори за промовирање на дијалогот и наоѓање политички решенија за кризата“, се вели во соопштението.

Директорот на најголемиот приватен производител на електрична енергија во Украина, ДТЕК, Максим Тимченко, вели дека земјата се приближува кон „хуманитарна катастрофа“ по месеци руски воздушни напади врз енергетскиот систем, а секој иден мировен договор мора да вклучува прекин на нападите врз енергетската инфраструктура.

Тој рече дека од октомври 2025 година, Русија води она што го нарече кампања на „енергетски терор“, насочена кон електраните и преоптоварување на системите за воздушна одбрана, објави „Ројтерс“.

Според украинските власти, Киев и околните региони се меѓу најтешко погодените, а градоначалникот на Киев ги повика жителите привремено да го напуштат градот ако имаат каде да одат.

„Ни треба енергетски прекин на огнот. Прекин на огнот околу енергетските објекти. Како може да зборувате за мир, а во исто време да напаѓате луѓе, знаејќи дека се смрзнуваат? Како тоа може да оди рака под рака?“, праша Тимченко.

Украина, рече тој, издржа две недели температури помеѓу минус 15 и минус 20 степени Целзиусови, додека Русија истовремено напаѓаше капацитети за транспорт, складирање и производство на гас.

Русија вели дека е насочена кон воената и енергетската инфраструктура што ја користат украинските вооружени сили.

„Блиску сме до хуманитарна катастрофа. Електричната енергија доаѓа три до четири часа, а потоа има пауза од 10 до 15 часа. Имаме станбени згради кои се без греење со недели“, рече Тимченко.

Според него, Украина преживува од увоз на гас, вклучително и од Соединетите Американски Држави, бидејќи нападите ги принудија гасните, јагленските и хидроелектраните да работат под капацитетот. ДТЕК изгуби помеѓу 60 и 70 проценти од својот производствен капацитет и претрпе штета во вредност од стотици милиони долари, рече Тимченко.

„Реконструкцијата на енергетскиот сектор би чинела помеѓу 65 и 70 милијарди долари“, рече Тимченко, повикувајќи се на проценките на Светска банка, а во многу случаи би барала изградба на целосно нови објекти. „Повеќе се работи за изградба на нов енергетски систем во Украина отколку само за негова обнова“, рече Тимченко.