Расте бројот на мртви во бомбашкиот напад во црквaта во Дамаск: Напаѓачот бил член на ИД

Бројот на жртви од самоубиствениот бомбашки напад во црквата „Свети Илија“ во Дамаск се искачи на 20, а 52 лица се повредени, соопшти денес сириското Министерство за здравство. Министерството соопшти дека бомбашот самоубиец кој го извршил нападот бил член на терористичката организација Исламска држава (ИД), објави сириската државна новинска агенција САНА.

Сириската опсерваторија за човекови права, со седиште во Велика Британија, објави дека во нападот загинале 22 лица, а десетици се повредени.

Групата соопшти дека се очекува прелиминарниот број на жртви да се зголеми.

Сириските медиуми објавија дека безбедносните сили поставиле безбедносен кордон околу местото на експлозијата, додека спасувачките екипи работат на пронаоѓање жртви и евакуирање на повредените во блиските болници.

Ова беше првиот терористички напад од страна на групата Исламска држава по падот на поранешниот претседател Башар ал-Асад, и се случува во време кога новата влада во Дамаск се обидува да ја добие поддршката на малцинствата. Веќе некое време постои загриженост за присуството на скриени ќелии на екстремистички групи во земјата.

Според очевидци, напаѓачот влегол во црквата и почнал да пука пред да го детонира елекот полн со експлозив што го носел.