Рама: Косово не треба да размислува за Србија, туку да си ги заврши домашните задачи

Албанскиот премиер Еди Рама изјави дека Косово не треба да размислува за Србија, туку да се фокусира на барањата на Европската Унија во врска со дијалогот и интеграцијата, бидејќи во спротивно, убеден е дека ќе продолжи да се изолира сè повеќе и повеќе, објави RTV21.

Рама зборуваше на конференцијата „Албанија, нов хоризонт“ во Виена за „Отворен Балкан“ и нерешените прашања меѓу Косово и Србија, и рече дека е тажен што гледа дека нема напредок во дијалогот меѓу Белград и Приштина.

Сепак, тој истакна дека Косово треба да го направи својот дел.

„Косово не треба да размислува за Србија, не треба да се грижи што прави Србија, туку треба да го направи својот дел. Да си ја заврши домашната задача и да го предаде целиот тефтер со завршените задачи на Европската Унија и да ја замоли да продолжи напред. Значи, ова нема никаква врска со исполнување или прифаќање на она што го бара Србија. Ова има врска со прифаќање на она што го бара Европската Унија“, рече Рама, пренесува „Косово онлајн“.

Според него, дијалогот со посредство на ЕУ е неуспешен затоа што форматот е погрешен.

„Го кажувам ова од првиот ден, а се случува затоа што се базира на еден многу едноставен принцип – земјите треба да ги исполнат условите поврзани со вредностите, принципите и начинот на живот на ЕУ. Значи, ако Косово го стори ова, тоа ќе биде во негов најдобар интерес, за да не се приврзе кон Србија, за да не размислува за тоа колку ќе бидат задоволни или незадоволни Србите, туку едноставно да ја заврши оваа работа. Во спротивно, ќе продолжи да се изолира сè повеќе и повеќе, а тоа е жално“, смета албанскиот премиер.

Во врска со патот на Албанија кон ЕУ, тој нагласи дека земјата е на вистинскиот пат, истакнувајќи дека Албанија ги престигна Северна Македонија и Србија во таа насока, бележејќи позитивен напредок во последните години.

„Претходно беше Северна Македонија, сега ја нема никаде на мапата. Постои и Србија, која исто така ја нема никаде. Во меѓувреме, Албанија се сметаше за „којзнае што“. Сега сме напред. Се надевам дека Србија ќе го тргне вистинскиот пат, но и БиХ. Мораме сами да ги решиме нашите проблеми. Во меѓувреме, Косово и Србија треба да најдат решение, бидејќи Белград ќе се затвори уште повеќе во себе ако ништо не се реши“, рече Рама.

Тој изјави дека Албанија има историска можност, но, како што нагласи, секогаш е неизвесно што може да се случи со Унијата.

„Мораме да го сфатиме тоа како работа и ќе си ја завршиме нашата работа. Шансите се големи, поради контекстот. Но, со ЕУ никогаш не се знае, може да се промени. Мораме да го дадеме својот максимум во овој момент, кога целата ситуација ќе биде правилно средена за нашата земја, што никогаш порано не се случило. Мораме да побрзаме за да не ни се испушти оваа можност“, рече Рама.