Рускиот претседател Владимир Путин на почетокот од неговата дводневна посета на Индија го критикуваше притисокот на САД врз азиската земја да престане да купува руска нафта додека Вашингтон купува нуклеарно гориво од Москва.
Путин говореше за индискиот телевизиски канал „Индија тудеј“, а разговорот беше објавен неколку часа откако слета во Њу Делхи, пристигнувајќи на посета за која двете земји се надеваат дека ќе ја зајакне трговијата.
Целта на првата посета на Путин на Индија по четири години е да се зголеми продажбата на руска нафта, ракетни системи и борбени авиони и да се прошири соработката надвор од енергетиката и одбраната. Рускиот претседател пристигнува во Индија во време на голем притисок од Вашингтон врз Њу Делхи да ги намали своите врски со Москва.
Двете земји се блиски уште од времето на поранешниот Советски Сојуз, а Русија е главен извор на оружје на Индија со децении. Азиската земја стана и најголем купувач на руска нафта транспортирана по море по воведувањето на западните санкции поради руската агресија врз Украина.
Увозот на нафта во Индија треба да падне на најниско ниво во последните три години овој месец, откако САД воведоа царини за увоз од Индија и ги заострија санкциите против Русија, кои влијаат и на трети земји.
Владата на американскиот претседател Доналд Трамп нагласи дека купувањето евтина руска нафта од страна на Индија ѝ помага на Москва да ја финансира војната во Украина.
„Соединетите Американски Држави продолжуваат да купуваат нуклеарно гориво од нас за своите нуклеарни централи. И тоа е гориво“, изјави Путин за „India Today“.
И покрај заканите на Трамп, индискиот премиер го потврди партнерството со Русија.
„Ако САД имаат право да купуваат наше гориво, зошто Индија не треба да има иста привилегија? Ова прашање заслужува длабинска анализа и ние сме подготвени да разговараме за тоа, вклучително и со претседателот Трамп“, додаде рускиот претседател.
Индија претходно изјави дека царините на Трамп се неоправдани и ирационални и потсети дека САД сè уште тргуваат со Русија. САД и Европската Унија продолжуваат да увезуваат руска енергија во вредност од милијарди долари, од течен природен гас до збогатен ураниум.
Запрашан за падот на купувањето нафта од неговата земја во Индија, Путин призна дека имало „одреден пад во вкупната трговија во првите девет месеци од оваа година“.
„Тоа е само мало прилагодување. Генерално, нашата трговска размена е на речиси исто ниво како и претходно. Трговијата со нафтени производи и сурова нафта, руска нафта, во Индија се одвива непречено“, заклучи Путин.
