Путин уверен дека ќе ја добие војната: Протекоа детали од разговорот меѓу Трамп и рускиот лидер

Објавени се досега непознати детали од разговорот меѓу Доналд Трамп и Владимир Путин.

Според „Волстрит џурнал“, американскиот претседател Доналд Трамп во приватен телефонски разговор со европските лидери рекол дека рускиот претседател Владимир Путин не сака да ја прекине војната бидејќи верува дека победува. Оваа информација ја потврдија тројца упатени во разговорот.

„Во понеделникот, претседателот Трамп, за време на телефонскиот разговор со европските лидери, рече дека рускиот претседател Владимир Путин не е подготвен да стави крај на војната во Украина бидејќи мисли дека победува“, пишува WSJ, повикувајќи се на извори.

Како што е соопштено, тоа е потврда на она што европските лидери долго време се сомневаа, но ова е првпат да го слушнат директно од Трамп. Неговата изјава е во спротивност со неговите претходни јавни тврдења дека Путин искрено сака мир.

По разговорите со Путин, Трамп извести за неговите разговори за време на разговорот со францускиот претседател Емануел Макрон, италијанската премиерка Џорџа Мелони, финскиот претседател Александар Стабс, германскиот канцелар Фридрих Мерц и украинскиот претседател Володимир Зеленски, пренесува украинскиот УНН.

Според информациите до кои дојде Аксиос, некои европски лидери изгледале изненадени, па дури и шокирани од изјавите на Трамп.

Белата куќа одби да го коментира извештајот, повикувајќи се на објавата на Трамп на социјалните мрежи во која тој рече: „Тонот и духот на разговорот беа одлични. Да не беше така, веднаш ќе кажев“.

ф
Иако се чини дека Трамп заклучи дека Путин во моментов не сака мир, тоа не го поттикна да го направи она што го бараа европските лидери и украинскиот претседател Володимир Зеленски – да го зголеми притисокот врз Русија.

Трамп, исто така, наводно разговарал со европските лидери претходно во неделата – ден пред неговиот двочасовен разговор со Путин. За време на тој повик, според извори, Трамп навести дека може да воведе санкции доколку Путин одбие прекин на огнот. Но, во понеделникот се предомисли и рече дека не е подготвен на тој чекор. Наместо тоа, тој предложи продолжување на преговорите меѓу Русија и Украина, но на пониско ниво и во Ватикан.

Телефонскиот разговор на Трамп со претседателот Зеленски и европските лидери во понеделникот, наводно, бил кулминација на европската дипломатска иницијатива која започна десетина дена порано, со цел Трамп да изврши притисок врз Путин.

Иако оваа иницијатива не резултираше со нови санкции, европските лидери сметаат дека сепак имала позитивен ефект.

„Тој процес им помогна на сите, вклучително и на Трамп, појасно да ја разберат позицијата на Путин: тој не сака да ја запре војната во оваа фаза. За Европејците тоа значеше и обезбедување уште посеопфатна поддршка за Украина“, пишува WSJ.

Според изворите, Европејците не веруваат дека администрацијата на Трамп би ја запрела испораката на американско оружје во Украина – се додека Украина или Европа ги сносат трошоците.