Русија започна со сериско производство на ракетниот систем „Орешник“, објави рускиот претседател Владимир Путин.
„Создадовме, пуштивме во употреба и започнавме со сериско производство на ракетниот систем со среден дострел „Орешник“, изјави Путин во вторник, за време на церемонијата на доделување награди на производителите на системите „Посејдон“ и „Буревестник“, пренесува РИА Новости.
Тој, исто така, рече дека производството на системите „Буревестник“ и „Посејдон“ е од историско значење за рускиот народ и е важно за безбедноста и стратешката паритет во наредните децении.
Путин, исто така, додаде дека ракетните системи „Сармат“ ќе бидат ставени во борбена готовност следната година.
Путин објави на 26 октомври дека се завршени тестовите на крстосувачката ракета со неограничен дострел „Буревестник“.
Началникот на Генералштабот на руските вооружени сили, Валериј Герасимов, изјави дека ракетата поминала околу 15 часа во воздух за време на тестовите и прелетала 14.000 километри, што, нагласи тој, не е нејзиниот максимум.
Русија, исто така, тестираше подводно торпедо „Посејдон“, објави претходно рускиот претседател.
На 21 ноември 2024 година, балистичката ракета со среден дострел „Орешник“, опремена со ненуклеарна хиперсонична боева глава, беше успешно тестирана во борбени услови за прв пат, соопшти агенцијата.
