Рускиот претседател Владимир Путин во средата им наложи на високите функционери да подготват предлози за можен тест на нуклеарно оружје – нешто што Москва не го направила од распадот на Советскиот Сојуз во 1991 година.
Министерот за одбрана Андреј Белоусов му рече на Путин дека „неодамнешните изјави и активности на САД“ се причина Русија „веднаш да започне со подготовки за целосно продолжување на нуклеарните тестови“.
Белоусов рече дека рускиот арктички полигон за тестирање на Новаја Земја би можел да биде домаќин на тестови во блиска иднина.
„Им наложувам на Министерството за надворешни работи, Министерството за одбрана… специјалните служби и релевантните цивилни агенции да сторат сè што е потребно за да соберат дополнителни информации за оваа тема, да ги анализираат во Советот за безбедност и да развијат координирани предлози за евентуален почеток на подготовките за нуклеарни тестови“, рече Путин.
Освен Северна Кореја, која последен пат спроведе таков тест во 2017 година, ниедна земја не извршила нуклеарна експлозија во 21 век. Безбедносните аналитичари предупредуваат дека обновените тестирања би ја дестабилизирале глобалната ситуација во време на веќе зголемени геополитички тензии.
Аналитичарите, исто така, предупредуваат дека ако една земја спроведе нуклеарен тест, другите би можеле да го следат примерот.
„Совршен пример за циклусот акција-реакција. На никој не му треба, но сепак би можеле да завршиме во таа ситуација“, напиша Андреј Баклицки, виш соработник во Институтот на ОН за прашања поврзани со разоружувањето, на Платформа X, коментирајќи ја изјавата на Белоусов.
САД последен пат тестираа нуклеарно оружје во 1992 година, Кина и Франција во 1996 година, а Советскиот Сојуз во 1990 година. Постсоветска Русија, која го наследи советскиот нуклеарен арсенал, никогаш не спроведе нуклеарен експлозивен тест.
„Поради програмите за тестирање на други земји, му наредив на Министерството за војна да започне со тестирање на нашето нуклеарно оружје на рамноправна основа. Овој процес започнува веднаш“, рече претседателот на САД, Доналд Трамп, минатата недела во изненадувачка најава.
Трамп сè уште не разјаснил дали се осврнува на експлозивни нуклеарни тестови – кои се одговорност на Националната администрација за нуклеарна безбедност – или на тестови на ракети способни да испорачаат нуклеарни боеви глави.
Русија минатиот месец ја тестираше својата нова крстосувачка ракета „Буревестник“ со нуклеарен погон, дизајнирана да носи нуклеарна боева глава. Исто така, спроведе вежби за лансирање на нуклеарни боеви глави и го тестираше суперторпедото „Посејдон“ со нуклеарен погон.
Тестирањето на систем за лансирање на нуклеарно оружје не вклучува нуклеарна експлозија. Ваквите детонации редовно ги вршеа нуклеарните сили за време на Студената војна, оставајќи сериозни еколошки последици – што доведе до страв кај многу активисти дека враќањето на тестирањето на експлозивни материи повторно би можело да има катастрофални последици, пренесеува Н1.
