Путин ги презентираше своите услови на маратонска средба со луѓето на Трамп

Рускиот претседател Владимир Путин разговараше за прекинување на војната во Украина со претставниците на американскиот претседател Доналд Трамп за време на разговорите што траеја речиси четири часа во текот на ноќта.

По разговорите, Кремљ нагласи дека за мировен договор треба да се реши територијалното прашање.

Средбата меѓу претставникот на американскиот претседател Стив Виткоф и зетот на Трамп, Џаред Кушнер, со Путин траеше до по три часот ноќва, по локално време.

Советникот за надворешни работи на Кремљ, Јуриј Ушаков, кој учествуваше на состанокот, рече дека „потврдено е дека не може да се очекува постигнување долгорочен договор без решавање на територијалното прашање“.

Ова се однесува на барањата на Москва Киев да ги повлече своите трупи од областите во источна Украина што Русија нелегално ги анектираше, но не ги окупираше целосно.

Ушаков, исто така, им рече на новинарите дека е договорено руските, украинските и американските претставници да разговараат за безбедносните прашања поврзани со идниот мировен договор денес во Абу Даби, Обединетите Арапски Емирати.

Ушаков рече дека за време на разговорите во Кремљ, САД изразиле надеж дека состанокот „ќе отвори перспективи за движење напред по цела низа прашања поврзани со прекинување на конфликтот и постигнување мирно решение“.

Според него, руската делегација ќе ја предводи шефот на воената разузнавачка служба, адмирал Игор Костјуков. Тој рече дека претставникот на Путин, Кирил Димитриев, ќе одржи одделни разговори за економски прашања со претставникот на САД, Виткоф, во Абу Даби.

Овој состанок во Абу Даби го најави вчера украинскиот претседател Володимир Зеленски во Давос, каде што се сретна со американскиот претседател Доналд Трамп.

Ушаков рече дека емисарите на Трамп го информирале Путин за состанокот на Трамп со Зеленски, како и за претходните разговори што американскиот претседател ги имал со украински и европски претставници.

На Виткоф и Кушнер им се придружил Џош Гринбаум, шеф на Федералната служба за набавки, кој е виш советник во Комитетот за мир на Трамп. Трамп го покани рускиот претседател Путин да се придружи на неговиот Комитет за мир, кој беше формиран вчера на маргините на Светскиот економски форум во Давос.

Русија соопшти дека ја разгледува понудата, а Путин ја потврди својата понуда да му даде 1 милијарда долари на Комитетот за мир за да помогне во финансирањето на реконструкцијата на Газа, кои ќе бидат земени од руските средства замрзнати во САД.

Запрашан за предлогот на Путин да се користат замрзнатите руски средства како придонес во Комитетот за мир, Трамп рече дека смета дека тоа е во ред. „Ако ги користи своите пари, тоа е одлично“, им рече Трамп на новинарите.

Зеленски се сретна со Трамп зад затворени врати околу еден час на маргините на Светскиот економски форум во Давос и го опиша состанокот како „продуктивен и значаен“.