Пуштен во употреба новиот објект на ООУ „Блаже Конески“ во Аеродром

Во присуство на премиерот Христијан Мицкоски, министерката за образование и наука, Весна Јаневска, како и на градоначалникот на Општина Аеродром, Дејан Митески, е пуштен во употреба новоизградениот објект во рамките на основното училиште „Блаже Конески“.

Градоначалникот Конески изјави дека новиот објект има 16 училници, нова опрема, лифт за децата со посебни потреби, како и посебни тоалети за нив, но и тоалети за останатите, како и нова аула.

– Проектот се реализираше со поддршка на Владата и на Општина Аеродром и чини 200 милиони денари – истакна Митески.

Тој ѝ се заблагодари на фирмата „Жикол“, која ги изведуваше градежните зафати за тоа што проектот е завршен пред истекот на рокот утврден во договорот, односно за 16 месеци.

Министерката за образование и наука, Јаневска, наведе дека претставува големо задоволство второто полугодие во ова училиште да се започне со ваков настан.

– Со ова се создаваат услови за подигнување на квалитетот на образованието – нагласи Јаневска.

Таа додаде дека ќе се продолжи со инвестирање во основните училишта, но и во средните.

– За следната година се предвидени преку 160 проекти во образованието со огромна вредност, со цел да се постигне повисок квалитет на образованието – нагласи Јаневска.

Премиерот додаде дека не може да не се биде задоволен и емотивен кога е во прашање реализација на ваков проект.

– Минатата година ја завршивме со пуштање во употреба на реконструираната Клиника за гинекологија и акушерство во рамки на Клиничкиот центар „Мајка Тереза“. Годинава ја отворивме со четири нови градинки во Кочани, Карбинци, Сопиште и Тетово, а многу наскоро ќе биде пуштена во употреба и реновираната гимназија во Тетово, „Кирил Пејчиновиќ“. Не треба да се заборават и спортските сали, булевари, експресни патишта, железница, автопатски делници, што се реализирани изминативе 18-19 месеци – истакна Мицкоски.

Тој им посака на учениците во новиот објект многу весели училишни денови, да стекнат нови знаења, а на вработените успешна работа и што поуспешно да им го пренесат знаењето на учениците.

(А. П.)