Во ООУ „Кузман Јосифовски Питу“ денеска официјално беше пуштен во употреба комплетно обновениот кабинет по информатика.
Со оваа инвестиција, учениците добија целосно нов и модерно опремен простор, со нови маси и столици, а целосно е заменета електрична инсталација, освежени се и молерисани ѕидовите и поставени се едукативни и инспиративни апликации.
Овој кабинет беше овозможен благодарение на донации од општествено одговорни компании. Новите десктоп компјутери се донирани од страна на Борче Стаменов, преку иницијативата donirajkompjuter.mk, како и од родителот Кирил Александров.
– Опремувањето на овој кабинет по информатика претставува уште еден чекор кон дигитализацијата на наставата – процес кон кој стреми целиот свет, а Кисела Вода како општина која прва се дигитализираше во регионот, го следи тој пат со целосна посветеност. Кога заедно инвестираме во децата, инвестираме во нашата иднина. Тоа е нашата најголема обврска и највредна мисија-истакна градоначалникот на Општина Кисела Вода, Орце Ѓорѓиевски.
ООУ „Кузман Јосифовски Питу“ инаку е првото целосно инклузивно основно училиште во Скопје. По завршувањето на реконструктивните зафати, училиштето доби нов покрив и фасада, лифт за ученици со попреченост, сензорна соба, пристапни рампи, специјални тоалети, тактилни патеки, со што е создадена целосно пристапна и инклузивна средина за сите ученици.
