Првпат по 35 години Германија предупредува на војна! „Подгответе залихи на храна, веќе сме на борбената линија“

Германската Федерална канцеларија за цивилна заштита и помош при катастрофи (BBK) издаде ново предупредување во кое се истакнува зголемената веројатност за војна, советувајќи ги граѓаните да подготвуваат залихи од храна за три до десет дена.

Ова е прв пат по 35 години BBK експлицитно да ја спомене војната во своите упатства, кои досега главно се фокусираа на природни катастрофи и технички дефекти.

Новите препораки доаѓаат по речиси четиригодишната војна меѓу Русија и Украина, која предизвика загриженост за безбедноста на Европа. Водичот на BBK, насловен како Подготовка за кризи и катастрофи, вклучува совети за справување со хибридни закани, како што се кибер напади, дезинформации, саботажи и војна. За прв пат, експлицитно се опфатени и воените сценарија.

Ралф Тислер, претседател на BBK, ја нагласи важноста на подготовката: „Секогаш се исплати да се биде добро подготвен“.

Ова тврдење го поддржува и шефот на Германската федерална разузнавачка служба (BND), Мартин Јегер, кој предупреди дека можноста за војна не треба да се потценува.

Водичот дава практични совети за подготовка на домаќинствата, со акцент на обезбедување самоодржливост до десет дена. Сепак, практичноста на складирање храна и вода за големи семејства во ограничен простор, особено е предизвик, имајќи ги предвид трошоците.

Типично семејство од четири члена, според препораките на BBK, треба да има залихи во вредност од 200-300 евра, вклучувајќи вода, зеленчук, овошје, млеко и други основни потреби. Ова бара не само финансиска инвестиција, туку и значителен простор за складирање.

За да се направи ова изводливо, BBK предлага интегрирање на итни залихи во редовните циклуси на потрошувачка. На потрошувачите им се советува да купуваат еден или два дополнителни производи секој пат кога одат во продавница, постепено зголемувајќи ги своите залихи без прекумерно складирање.

Водичот, исто така, советува проверка на домашните аптеки за основни лекови, како и подготовка на основни алатки како што се фенерче, радио на батерии и шпорет за кампување. Исто така, се препорачува да се користи апликација за известување за да се биде информиран во случај на прекини на електричната енергија или други прекини, пренесува Тпортал.