Првата дама на Франција „мора“ на лекарски преглед за да ја докаже женственоста

Американската крајнодесничарска активистка Кандис Овенс изјави дека ќе ја принуди првата дама на Франција, Брижит Макрон, да се подложи на лекарски преглед како дел од тековната правна битка. Според „Дејли меил“, Овенс бара 72-годишната сопруга на францускиот претседател да се подложи на „независен преглед“, најавувајќи дека ќе „дојде и ќе ја земе медицинската документација на првата дама“.

Контроверзноста започна на почетокот на 2025 година, кога Овенс почна да шири гласини дека Брижит Макрон не е жена, туку маж, и дека нејзиниот идентитет го презел нејзиниот биолошки брат Жан-Мишел Троние. Наводите на активистката предизвикаа силни реакции во Франција и пошироко, што доведе до судска постапка од страна на претседателската двојка.

Во јули оваа година, Брижит и Емануел Макрон поднесоа тужба против Овенс во суд во Делавер. Во обемната тужба од 219 страници се тврди дека активистката водела „кампања на глобално понижување“, со бројни докази за да ги побие нејзините тврдења – вклучувајќи фотографии од младата Брижит, објава за раѓање во весник и фактот дека имала три деца со својот прв сопруг.

Тужбата, исто така, го доведува во прашање кредибилитетот на Кандис Овенс, тврдејќи дека нејзината јавна кариера е „изградена врз редовно ширење дезинформации под маската на новинарството“ и дека нејзиното медиумско влијание се базира на „провокации, а не на вистина“.