Прв јавен повик за финансирање културно-уметнички проекти за „Скопје – Европска престолнина на културата 2028“

Град Скопје го објави првиот јавен повик за финансирање на културно-уметнички проекти во рамки на програмата „Скопје – Европска престолнина на културата 2028“.

– Со отворањето на овој конкурс, Скопје влегува во нова фаза во која идеите треба да прераснат во реални, одржливи и европски релевантни културни проекти. Проекти кои нема да живеат само една година, туку ќе остават трајна вредност во градот, во заедниците и во целокупниот културен екосистем – соопштија од Град Скопје.

Оттаму додаваат дека за таа цел, се бараат проекти со силен концепт и со јасна европска димензија, општествена и културна вредност, професионална реализација и подготвеност за работа во комплексен и динамичен процес

Првата фаза на селекција на аплицираните проекти ќе ја спроведе независното тело „Скопје 2028“, врз основа на формалните и квалитативните критериуми утврдени во јавниот повик.

Втората фаза на селекција ќе ја спроведе главното жири, составено од двајца домашни експерти, уметничкиот раководител, како и два меѓународни експерти од Европската Унија, согласно со добиените стручни насоки, добиени по консултација со администрацијата во Брисел.

– Европска престолнина на културата не е сцена за импровизација. Тоа е заедничка обврска кон Европа, дека знаеме да создаваме, да управуваме и да реализираме врвни културни програми – нагласуваат  градските власти.

Предвиден е вкупен буџет од 300.000 евра, при што еден грант има максимален износ до 50.000 евра.

Проектите избрани преку овој конкурс ќе станат составен дел од официјалната програма „Скопје – Европска престолнина на културата 2028“, спроведувана низ целата територија на градот и во десетте општини, како во институциските, така и во јавните простори –  се наведува во конкурсот кој е меѓународен.

Во јавниот повик, исто така е нагласено дека проектите може да се одвиваат помеѓу 2026 и 2028 година, со периоди на резиденција или активности кои се движат од 7 до 60 работни денови, во зависност од обемот.

Рокот за пријавување е до 29 март,  2026 година.

Во септември 2023 година, Скопје ја доби титулата град на културата во Европа за 2028, европска иницијатива за културна соработка.
Според конкурсот, „Скопје – Европска престолнина на културата 2028“  се води според мотото „Култура над поделба“, кое ја отсликува историската улога на градот како место на средби, издржливост и солидарност.