Шест полицајци беа повредени денес во судир со демонстрантите за време на протестот во центарот на Тирана, на кој опозицијата бараше оставка од вицепремиерката Белинда Балука поради наводна корупција, додека собраните граѓани фрлаа молотови коктели врз зградата на албанската влада.
Демонстрантите, според „Еуроњуз Албанија“, прво се собрале пред зградата на владата, каде што, по говорот на лидерот на Демократската партија, Сали Бериша, некои учесници фрлиле молотови коктели и огномет кон зградата.
Полицијата интервенирала користејќи водени топови за да ја растера толпата, со повици децата да се тргнат од собирот.
По кратките судири и обидите за отстранување на металните огради, протестот се преселил во албанскиот парламент, каде што се случиле нови инциденти.
Демонстрантите фрлале молотови коктели и ракети, предизвикувајќи пожар и нови судири со полицијата, а едно возило било запалено.
Министерката за внатрешни работи, Албана Кочиу, изјави на социјалните мрежи дека правото на протест „повторно е прекршено од група која избрала сила пред зборови“, додавајќи дека насилството никогаш не може да биде алатка и дека ниедна агенда не го оправдува неговото користење.
