Француската полиција располага со неколку физички докази, вклучувајќи кацига и ракавица што веројатно ги користеле крадците на скапоцености од Лувр.
Мобилната платформа на кранот, која крадците ја користеле за да се искачат на балконот и прозорците на галеријата, наводно била украдена од продавач кој поставил оглас на веб-страницата „Ле Бонкоан“, објави весникот „Паризиен“.
Истрагата за кражбата на богатството во Лувр е во тек, а истражителите од Бригадата за сузбивање на криминалот (BRB), во соработка со Централната канцеларија за борба против трговијата со културни добра (OCBC), продолжуваат да собираат изјави од сведоци и материјални докази што би можеле да помогнат во идентификувањето на членовите на бандата што украла осум непроценливи парчиња накит од две витрини во галеријата „Аполо“ во Лувр.
Елекот и опремата пронајдени на местото на настанот веднаш биле испратени на анализа.
Според францускиот весник, истражителите сега имаат нови докази, пронајдена е мотоциклистичка кацига што му припаѓала на еден од сторителите.
Истражителите, исто така, заплениле ракавица пронајдена на платформата на кранот, како и клучевите од камионот што сторителите го користеле за да пристапат до балконот и прозорците на галеријата „Аполо“.
Според претходните информации, платформата била украдена од сопственикот, кој ја ставил на продажба на веб-страницата Leboncoin.
Крадците насилно ја украле од сопственикот, кој го препознал својот предмет на снимката што континуирано се емитува на вестите од кражбата во неделата.
Четири лица провалиле во познатата галерија Аполо во музејот Лувр во Париз околу 9:30 часот наутро во неделата. Тие користеле механичка скала монтирана на возило за да се искачат до галеријата.
Крадците го пробиле безбедносното стакло и зеле девет непроценливи културни предмети, од кои еден, круната на царицата Евгенија, сопруга на Наполеон III, била пронајдена на местото на настанот, за која се верува дека ја испуштиле сторителите за време на нивното бегство. Предметите датираат од 19 век и припаѓале на француско благородништво, а се украсени со илјадници дијаманти и други скапоцени камења.
