Промоција и претстава: „Златната книга на Лудви“ од Тина Иванова

Во рамките на фестивалот „Денови на литературата“ на „Арс ламина“, во книжарницата на „Литература“ во „Дајмонд мол“, со почеток во 18:00 часот, оваа сабота (7 февруари), ќе се одржи промоција на книгата „Златната книга на Лудви“ од Тина Иванова. Илустрациите се дело на Рената Јосифовска.

Книгата е инспирирана од животот и творештвото на големиот композитор Лудвиг ван Бетовен и е првата од петте книги за деца од серијалот „Музичка кутија“, инспирирани и од Моцарт, Бах, Верди и Чајковски.

Промоцијата ќе ја води уредничката Бисера Бендевска, во форма на краток дијалог со авторката. По промоцијата, ќе се одржи мини претстава за деца, во која ќе учествуваат авторката и диригентката Дијана Имери-Илкоска, задолжена за интерпретација на музиката на Бетовен за пијано.

„Златната книга на Лудви“, како и сите книги од серијалот, не го обработува животот на композиторите, туку создава нови бајки за деца. Главниот лик, малиот Лудви, е дете што сака книги и свири на пијано, но минува низ низа неочекувани случувања. Приказната е топла, разиграна и полна со емоции, вистинско доживување за децата и возрасните.

Издавач на книгата и на целиот сет „Музичка кутија“ е „Либи“ (дел од „Арс ламина публикации“).